Shri-Lanka sohillari yaqinida may oyida ustiga 25 tonna azot kislotasi va boshqa kimyoviy moddalar ortilgan MV X-Press Pearl kemasida 13 kunlik yong‘in sodir bo‘lgandi. 17-iyun kuni kema dengiz tubiga cho‘kib ketdi, mutaxassislar ekologik falokat oqibatlaridan tashvishlanmoqda, deb yozadi Associated Press.
Singapur bayrog‘i ostidagi kema operatorining ma’lum qilishicha, kema Shri-Lankaning norasmiy poytaxti — Kolombo shahridan 18 kilometr uzoqlikda, dengizning 21 metr chuqurlikdagi tubida yotibdi.
Shri-Lanka dengiz atrofini muhofaza qilish idorasi rahbarining aytishicha, dengizdagi notinchlik va musson mavsumi sababli kemani suv ostidan olib chiqish hozirda xavfli bo‘lib, mavsum sentabrda tugaydi.
Eslatib o‘tamiz, 20-may kuni Kolombo portiga yaqin joyda MV X-Press Pearl kemasida yong‘in boshlanib, bir-nechta portlashlarga sabab bo‘lgan edi. Hodisa oqibatida ikki kishi jarohatlangan. Kema ekipaji voqea joyidan evakuatsiya qilingan. Kema sohil chizig‘idan 50 dengiz mili masofasiga uzoqlashtirilgan. Yong‘in oradan 13 kun o‘tibgina to‘liq bartaraf qilingan. Ammo kema cho‘kishni boshlagan va nihoyat 17-iyun kuni dengiz tubiga butunlay g‘arq bo‘lgan.
Kemadagi xavfli yuklarning aksariyati yong‘in oqibatida vayron qilingan, ammo qoldiqlar va zaharli chiqindilar allaqachon yaqin plyajlarni ifloslantirgan. Mutaxassislar kemada qolgan kimyoviy moddalar va neftning to‘kilishi dengiz hayotiga zarar yetkazishi mumkinligidan xavotirlanmoqda.
Avvalroq Shri-Lanka kema egasidan 40 million dollar talab qilgani xabar qilingan.
Mavzuga doir:
- Ummon ko‘rfazida Eron dengiz flotining eng katta kemasi yong‘in tufayli cho‘kib ketdi (video)
- Ulkan kema Suvaysh kanaliga tiqilib qoldi, buning ortidan neft narxi keskin o‘sdi (video)
- Boltiq dengizida bortida 335 kishi bo‘lgan parom o‘t oldi
- Indoneziyada bortida 53 kishi bo‘lgan suvosti kemasi bedarak yo‘qoldi
Izoh (0)