Шри-Ланка соҳиллари яқинида май ойида устига 25 тонна азот кислотаси ва бошқа кимёвий моддалар ортилган MV X-Press Pearl кемасида 13 кунлик ёнғин содир бўлганди. 17 июнь куни кема денгиз тубига чўкиб кетди, мутахассислар экологик фалокат оқибатларидан ташвишланмоқда, деб ёзади Associated Press.
Сингапур байроғи остидаги кема операторининг маълум қилишича, кема Шри-Ланканинг норасмий пойтахти — Коломбо шаҳридан 18 километр узоқликда, денгизнинг 21 метр чуқурликдаги тубида ётибди.
Шри-Ланка денгиз атрофини муҳофаза қилиш идораси раҳбарининг айтишича, денгиздаги нотинчлик ва муссон мавсуми сабабли кемани сув остидан олиб чиқиш ҳозирда хавфли бўлиб, мавсум сентябрда тугайди.
Эслатиб ўтамиз, 20 май куни Коломбо портига яқин жойда MV X-Press Pearl кемасида ёнғин бошланиб, бир-нечта портлашларга сабаб бўлган эди. Ҳодиса оқибатида икки киши жароҳатланган. Кема экипажи воқеа жойидан эвакуация қилинган. Кема соҳил чизиғидан 50 денгиз мили масофасига узоқлаштирилган. Ёнғин орадан 13 кун ўтибгина тўлиқ бартараф қилинган. Аммо кема чўкишни бошлаган ва ниҳоят 17 июнь куни денгиз тубига бутунлай ғарқ бўлган.
Кемадаги хавфли юкларнинг аксарияти ёнғин оқибатида вайрон қилинган, аммо қолдиқлар ва заҳарли чиқиндилар аллақачон яқин пляжларни ифлослантирган. Мутахассислар кемада қолган кимёвий моддалар ва нефтнинг тўкилиши денгиз ҳаётига зарар етказиши мумкинлигидан хавотирланмоқда.
Аввалроқ Шри-Ланка кема эгасидан 40 миллион доллар талаб қилгани хабар қилинган.
Мавзуга доир:
Изоҳ (0)