Shri-Lankada MV X-Press Pearl nomli katta konteynerlar tashuvchi yuk kemasida 20-may kuni boshlangan yong‘in o‘chirildi. Bu haqda The Australian xabar berdi.
“Harbiy dengiz floti Shri-Lanka sohillari yaqinida Singapur yuk kemasida qayd etilgan va 13 kun avval boshlangan yong‘in muvaffaqiyatli o‘chirilganini xabar qildi”, — deyiladi xabarda.
Qayd etilishicha, yong‘in to‘liq bartaraf qilinganidan keyin Niderlandiyaning SMIT qutqaruv kompaniyasi ekspertlari kema bortiga chiqib, uning mashina bo‘linmasi to‘liq suv ostida qolib ketganini aniqlagan.
Avval Shri-Lankaning Kolombo sohillari yaqinida 25 tonna azot kislotasi ortilgan MV X-Press Pearl kemasida bir necha kun avval yong‘in sodir bo‘layotgani va portlashlar ham kuzatilgani xabar qilingandi.
May boshida Bangladeshda yo‘lovchi tashuvchi qayiqning yuk kemasi bilan to‘qnashuvi yo‘lovchilarning o‘limiga sabab bo‘lgandi. Aprel oyida esa BAA qirg‘oqlarida Isroil yuk kemasiga hujum uyushtirilgani, mazkur holatdan keyin mamlakat harbiy dengiz kuchlari shay holatga keltirilgani xabar qilingandi.
Izoh (0)