Shimoliy Koreya 2005-yildan buyon birinchi marta boshqa davlatga pul xayriya qildi

Shimoliy Koreya Birlashgan Millatlar Tashkiloti (BMT)ning Myanma davlati uchun gumanitar yordam tashabbusiga 300 ming dollar xayriya qildi, deb yozadi The Korea Times.

Ta’kidlanishicha, bu Pxenyanning 2005-yildan buyon birinchi marta boshqa davlatga pul xayriya qilishi.

The Korea Times yozishicha, Shimoliy Koreya Myanma bilan yaxshi munosabatda. Masalan, yanvar oyida Shimoliy Koreya yetakchisi Kim Chen In Myanma mustaqilligining 73 yilligi munosabati bilan mamlakat prezidentiga murojaat yuborgan. Siyosatchi ikki mamlakat o‘rtasidagi an’anaviy do‘stona munosabatlarni yanada rivojlantirishga umid bildirgan.

Fevral oyidagi harbiy to‘ntarishdan keyin jabr ko‘rgan Myanmani KXDRdan tashqari, Janubiy Koreya, shuningdek, bir nechta G‘arb davlatlari qo‘llab-quvvatlagan. Eng katta miqdorda xayriya qilgan AQSh mamlakatga 23 million dollardan ko‘proq mablag‘ yuborgan.

Shimoliy Koreya kamdan kam hollarda moliyaviy xayriya qiladi, chunki u xalqaro reytinglar bo‘yicha dunyodagi eng qashshoq davlatlardan biri. 16-iyun kuni Kim Chen In mamlakatda ocharchilik bo‘lishi mumkinligi, oziq-ovqat bilan bog‘liq vaziyat tarangligini aytdi. Shimoliy Koreya rahbarining so‘zlariga ko‘ra, 2020-yilgi tayfun oqibatida g‘alla yetishtirish rejasi bajarilmay qolgani bunga sabab bo‘lmoqda. Shuningdek, mamlakatda koronavirus tarqalishiga qarshi qo‘llanilgan choralar vaziyatni yanada og‘irlashtirgan.

Avvalroq Shimoliy Koreyada koronavirus tarqalishiga qarshi kurash uchun o‘rnatilgan qattiq cheklovlar sharoitida xalqaro gumanitar tashkilotlar, xususan, Jahon oziq-ovqat dasturining so‘nggi xodimlari mamlakatni tark etishga majbur bo‘lgani haqida xabar berilgandi.