Hyundai Motor kompaniyasi havo transportini yaratish borasidagi ishlarini tezlashtirishga qaror qildi. Hyundai’ning global operatsion ijro direktori Xose Munyosning ma’lum qilishicha, Janubiy Koreya markasining birinchi uchar taksilaridan 2025-yilga borib AQShning yirik aeroportlarida foydalanish mumkin bo‘ladi. Motor nashrining yozishicha, avvalroq kompaniya bu boradagi sanani 2028-yil deb e’lon qilgan.
Munyosning ta’kidlashicha, kompaniya endi paydo bo‘layotgan havo transporti bozorini o‘sishning ajoyib imkoniyati sifatida ko‘rib chiqmoqda. U texnologiyalar mazkur yo‘nalishda rivojlanishiga “mutlaqo ishonchi komilligini” qo‘shimcha qilgan.
Kelajakdagi avtopark tarkibidan uchar yo‘lovchi avtomobillaridan tashqari, tijoriy yuklarni tashishda ham foydalanish mumkin bo‘lgan transport vositalari o‘rin oladi. Vaqt o‘tishi bilan Hyundai megapolislar yo‘llarini yengillashtirish imkonini beradigan havo transporti bilan bog‘liq butun boshli xizmat ko‘rsatish sohasini yo‘lga qo‘yish niyatida.
“Gap kelajak texnologiyalari haqida ketar ekan, hech qachon juda erta bo‘lmaydi. Birinchi boshlaganlar g‘olib bo‘ladi”, — deydi top-menejer.
Hyundai uchar avtomobillarni yaratish bilan shug‘ullanadigan bo‘linmasini 2019-yilda ishga tushirgan va unga olti yil davomida 1,5 milliard dollar investitsiya kiritishni rejalashtirgan. Bo‘linmagan 30 yil davomida NASA’da ishlagan Chin CHjevon boshchilik qilmoqda.
Hozirda kompaniya besh-olti nafar yo‘lovchi sig‘adigan aerotaksi ustida ish olib bormoqda: ular insonlarni qatnov ko‘p bo‘lgan shahar markazlaridan aeroportlarga, yer va havo transportiga bog‘liq markazlar tom qismiga eltib qo‘yishi mumkin.
Uchar mashinalarni yaratishda Hyundai Amerikaning Uber servisi bilan hamkorlik olib bormoqda. Yanvar boshida kompaniya besh o‘rinli, sakkizta rotorga ega S-A1 aerotaksisini taqdim etgandi: ularning to‘rttasi manyovrchanlik uchun, yana to‘rttasi — vertikal uchish-qo‘nishga javob beradi. Apparatning maksimal tezligi soatiga 290 kilometrga yetadi, parvoz balandligi esa 300-600 metr oralig‘ida.
Uchar avtomobillar ustida Hyundai’dan tashqari boshqa yirik avtomobil ishlab chiqaruvchilar, xususan, General Motors, Daimler, Gelly va Toyota ham ish olib bormoqda.
Avvalroq Moskvada bir marta quvvatlanish orqali 100 km yo‘l bosa oladigan havo taksisi sinovdan o‘tkazilayotgani to‘g‘risida xabar berilgandi.
Izoh (0)