Amerikaning LBI Limited firmasi 1977-yilgi Ford F-150 bazasida yaratilgan noyob Hoonitruck pikapini sotuvga qo‘ydi. “Jimxana” seriali uchun maxsus yaratilgan avtomobil 1,1 million dollarga baholanmoqda. Bitim amalga oshsa, pikap o‘z modeli tarixidagi eng qimmat nusxaga aylanadi, deb xabar beradi Motor.
Modifikatsiyaga uchragan Hoonitruck amerikalik ekstremal Ken Blok “Jimxana” drift-serialini suratga olish vaqtida boshqargan eng mashhur mashina hisoblanadi. Superpikap 1977-yilgi klassik Ford F-150 bazasida yaratilgan. Biroq ushbu mashinaga donordan faqat kuzov panellari meros bo‘lib qolgan. Bundan tashqari, yuk mashinasi uchun maxsus individual g‘ildirak diskalari yaratilgan.
Hoonitruck kapoti ostidan 3,5 litrli V6 o‘rin olgan bo‘lib, uning ustida Ford Performance muhandislari va Roush atelyesi tyunerlari ish olib borgan. Agregat prototipi “Le-Mandagi 24 soat” uchun maxsus yaratilgan. Motorning yana bir o‘ziga xosligi alyuminiyli gaz chiqarish kollektorining 3D-printerda chop etilganida.
Ishlab chiqarish vaqtida ushbu ehtiyot qism additiv texnologiya yordamida yaratilgan tarixdagi eng katta detal bo‘lgan. Modifikatsiya natijasida dvigatel 927 ot kuchi va 952 Nm aylanuvchi momentni taqdim eta olgan. Noyob agregat olti pog‘onali “sekvental” yordamida boshqariladi.
Amerika kompaniyasi Hoonitruck bilan birga ko‘plab ehtiyot qismlarni, jumladan, dvigatelning zaxira bloki, g‘ildiraklar va kuzovning ayrim qismlarini beradi.
Avvalroq Elvis Presliga tegishli bo‘lgan 54 yillik GMC pikapi auksionga qo‘yilgani, dunyodagi eng kuchli pikaplardan biri konveyerdan chiqishga ulgurmay pachaqlangani to‘g‘risida xabar berilgandi.
Izoh (0)