12-iyun kuni Jizzax viloyatining G‘allaorol tumanida terrorchilik tashkiloti tarkibiga kirmoqchi bo‘lgan shaxslar ushlandi. Bu haqda viloyat IIB axborot xizmati xabar berdi.
Ma’lum qilinishicha, huquqni muhofaza qiluvchi organlar xodimlari tomonidan o‘tkazilgan tezkor tadbirlarda Suriyada terrorchilik harakatlarini amalga oshirayotgan “Tavhid va jihod katibasi” xalqaro terrorchilik tashkiloti tarkibiga qo‘shilishni rejalashtirayotgan G‘allaorol tumanida yashovchi bir guruh shaxslar ashyoviy dalillar bilan qo‘lga olingan.
“Mazkur fuqarolar xorijda bo‘lgan vaqtida internet tarmog‘i orqali terrorchilik tuzilmalari yollovchilarining ta’siriga tushib, yashash manzillariga qaytib kelgandan so‘ng ushbu terrorchilik tashkilotining buzg‘unchi g‘oyalarini aholi orasida faol targ‘ib qilib kelgani aniqlangan”, — deyiladi xabarda.
Hozirda holat bo‘yicha surishtiruv va tergov harakatlari olib borilmoqda.
Avvalroq Toshkent shahri va Toshkent viloyatida, Andijon shahrida “Jihodchilar” guruhi a’zolari qo‘lga olingani, Farg‘onada esa “Hizb ut-Tahrir” terrorchilik tashkiloti faoliyatiga chek qo‘yilgani to‘g‘risida xabar berilgandi.
Izoh (0)