Toshkent viloyatidagi tuman va shaharlar chegarasini o‘zgartirishga oid masala Qonunchilik palatasida ko‘rib chiqildi

Oliy Majlis Qonunchilik palatasining navbatdagi majlisida deputatlar Toshkent viloyatining ma’muriy-hududiy birliklari chegaralarini o‘zgartish to‘g‘risidagi masalani ko‘rib chiqmoqda. Bu haqda quyi palata matbuot xizmati xabar berdi.

Qayd etilishicha, Toshkent viloyati ma’muriy-hududiy birliklar chegaralarini tartibga solish anklav hududlarni tugatish hamda mahalliy davlat hokimliklari organlari tomonidan hudud boshqaruvini yanada soddalashtirishga olib keladi.

Shuningdek, Toshkent viloyati shaharlari va tumanlari chegarasidagi muammoli masalalarni yechish, aholi turmush darajasi sifatini oshirish, ijtimoiy infratuzilmalar hamda yo‘l xo‘jaligini tubdan yaxshilash imkonini beradi.

Toshkent viloyatining ma’muriy-hududiy birliklari chegaralari quyidagicha o‘zgarmoqda:

• Bo‘ka tumanidan 8,2 gektar Oqqo‘rg‘on tumani tarkibiga;
• Angren shahridan 143,6 gektar, O‘rta Chirchiq tumanidan 3278,9 gektar maydon Ohangaron tumaniga;
• Ohangaron tumanidan 2931,8 gektar maydon Angren shahri tarkibiga;
• Angren shahridan 1094,0 gektar, Bo‘stonliq tumanidan 312,2 gektar yer maydoni Parkent tumaniga;
• Parkent tumanidan 493,3 gektar yer maydoni Bo‘stonliq tumaniga;
• Bekobod tumanidan 588,6 gektar Bekobod shahri tarkibiga;
• Bo‘stonliq tumanidan 256,7 gektar Chirchiq shahri tarkibiga;
• Zangiota tumanidan 8,9 gektar yer maydoni Yangiyo‘l tumaniga;
• Yangiyo‘l tumanidan 286,9 gektar yer maydoni Zangiota tumani tarkibiga va 388,0 gektar yer maydoni Yangiyo‘l shahri tarkibiga;
• Yuqori Chirchiq tumanidan 60,1 gektar Qibray tumani  tarkibiga;
• Qibray tumanidan 1884,9 gektar maydon Yuqori Chirchiq tumani tarkibiga;
• 62,0 gektar yer maydoni Bo‘stonliq tumani tarkibiga;
• 1584,0 gektar yer maydoni Chirchiq shahri tarkibiga;
• Piskent tumanidan 286,75 gektar yer maydoni Bo‘ka tumani tarkibiga;
• 3564,6 gektar maydon Olmaliq shahri tarkibiga;
• Olmaliq shahridan 102,5 gektar yer maydoni Piskent tumaniga;
• Ohangaron tumanidan 23,1 gektar yer maydoni Olmaliq shahri tarkibiga o‘tkazilmoqda.

Majlisda xalq vakillari kun tartibidagi masala yuzasidan Qonunchilik palatasining qarorini qabul qilgan.Eslatib o‘tamiz, 2020-yilning 5-avgust kuni Shavkat Mirziyoyev Toshkent shahri va Toshkent viloyatining o‘zaro chegaradosh bo‘lgan tumanlari hududlarini o‘zgartirish bo‘yicha tayyorlangan loyihalar taqdimoti bilan tanishgandi. O‘shanda aholiga qulaylik yaratish maqsadida shahardan Toshkent viloyatiga 1010 gektar, viloyatdan poytaxtga 10 196 gektar yer maydoni o‘tkazilishi rejalashtirilgan edi. Keyinroq Ulug‘bek shaharchasining aholisi Toshkent viloyati tarkibiga, shuningdek, Uchtepa tumani yashovchilari uchta mahalla Toshkent viloyatining Zangiota tumani tarkibiga o‘tkazishga qarshi chiqqandi.