2020-yilda Davlat xavfsizlik xizmati idoralari sa’y-harakati bilan 4 ta terrorchilik aktining oldi olindi. Ulardan 2 tasi O‘zbekistonda, 2 tasi MDH mamlakatlarida sodir etilishi rejalashtirilgan edi. Bu haqda DXX matbuot xizmatiga tayanib, O‘zA xabar berdi.

Shuningdek, ma’lum qilinishicha, ekstremistik va terroristik tashkilotlarning 67 ta yashirin guruhlari faoliyatiga chek qo‘yilgan.

Ekstremizm va terrorizmga aloqadorlikda ayblanib, xorijda yashirinib yurgan 98 nafar O‘zbekiston fuqarosi mamlakatga olib kelindi hamda javobgarlikka tortilgan.

Bundan tashqari, 747 kilogrammdan ortiq giyohvand moddalar, 251 ming dona psixotrop tabletkalar, 594 dona qurol, 4781 dona o‘q-dori va 24,4 kilogramm portlovchi moddalar noqonuniy muomaladan olingan, 540 dan ortiq korrupsiya bilan bog‘liq holatlarga chek qo‘yilgan.

Budjet va kredit mablag‘larining talon-taroj qilinishi hamda maqsadsiz ishlatilishi bilan bog‘liq holatlar aniqlanib, 557 milliard so‘m davlat foydasiga undirilgan.

Ta’kidlanishicha, noqonuniy migratsiya va odam savdosiga aloqador 102 ta jinoiy guruh fosh etilgan, chegaradan noqonuniy olib o‘tilgan 58,3 milliard so‘mlik tovar-moddiy boyliklar qo‘lga olingan.

Shu bilan birgan, O‘zbekiston Prezidentining topshirig‘iga ko‘ra amalga oshirilgan “Mehr 3” va “Mehr 4” gumanitar operatsiyalari doirasida Suriya Arabistoni va Afg‘oniston davlatlarida og‘ir sharoitda qolgan 122 nafar ayollar va bolalar mamlakatga olib kelingan.

Eslatib o‘tamiz, 2019-yilning sentabrida Oliy Majlis Senatining o‘n oltinchi yalpi majlisida “O‘zbekiston Respublikasi Davlat xavfsizlik xizmati kunini belgilash to‘g‘risida”gi qonun ko‘rib chiqilgan va unga ko‘ra, 5-aprel Davlat xavfsizlik xizmati kuni etib belgilangan edi.