12 июнь куни Жиззах вилоятининг Ғаллаорол туманида террорчилик ташкилоти таркибига кирмоқчи бўлган шахслар ушланди. Бу ҳақда вилоят ИИБ ахборот хизмати хабар берди.
Маълум қилинишича, ҳуқуқни муҳофаза қилувчи органлар ходимлари томонидан ўтказилган тезкор тадбирларда Сурияда террорчилик ҳаракатларини амалга ошираётган «Тавҳид ва жиҳод катибаси» халқаро террорчилик ташкилоти таркибига қўшилишни режалаштираётган Ғаллаорол туманида яшовчи бир гуруҳ шахслар ашёвий далиллар билан қўлга олинган.
«Мазкур фуқаролар хорижда бўлган вақтида интернет тармоғи орқали террорчилик тузилмалари ёлловчиларининг таъсирига тушиб, яшаш манзилларига қайтиб келгандан сўнг ушбу террорчилик ташкилотининг бузғунчи ғояларини аҳоли орасида фаол тарғиб қилиб келгани аниқланган», — дейилади хабарда.
Ҳозирда ҳолат бўйича суриштирув ва тергов ҳаракатлари олиб борилмоқда.
Аввалроқ Тошкент шаҳри ва Тошкент вилоятида, Андижон шаҳрида «Жиҳодчилар» гуруҳи аъзолари қўлга олингани, Фарғонада эса «Ҳизб ут-Таҳрир» террорчилик ташкилоти фаолиятига чек қўйилгани тўғрисида хабар берилганди.
Изоҳ (0)