O‘zbekiston Oliy sudi 11-iyun kuni Universal Packing Master va Jemchug House qurilish kompaniyalarining Toshkentning Bobur ko‘chasida joylashgan 7-uyni Moddiy madaniy meros obyekti ro‘yxatiga kiritish borasidagi oldingi instansiya qarori ustidan kiritgan kassatsion shikoyatini qondirishni rad etdi. Bu haqda Makon Media’ga tayanib, “Gazeta.uz” xabar berdi.
Fevral oyida Toshkent tumanlararo ma’muriy sudi yirik qurilish kompaniyasi buzib tashlashga uringan Bobur ko‘chasidagi 7-uyga bog‘liq munozarali ish bo‘yicha yakuniy qarorni chiqargandi. Hal qiluv qaroriga ko‘ra, arizachi N.Yunusova va O.Piantkovskayaning arizasi qanoatlantirilib, Toshkent shahar hokimining 2007-yil 2-avgustdagi 697-sonli qarorining Toshkent shahar Yakkasaroy tumani Bobur ko‘chasi 7-uyni madaniy meros obyektlari davlat ro‘yxatidan chiqarishga oid qismini haqiqiy emas deb topilgan.
15-mart kuni Toshkent shahar ma’muriy sudi Universal Packing Master va poytaxt hokimligining apellyatsion shikoyatini ko‘rib chiqmagan.
Oliy sudning Z.Qurbonova, I.Alimov va Sh.Sherqulovdan tarkib topgan Sud kollegiyasi 11-iyun kuni birinchi va apellyatsiya instansiyalari sudlarining qarorlarini o‘zgarishsiz qoldirib, shahar aholisi foydasiga qaror qabul qildi.
Sud Yakkasaroy tumani Bobur ko‘chasidagi ikki qavatli 7-uy Vazirlar Mahkamasining 2021-yil 3-martdagi qarori bilan Moddiy madaniy merosi ko‘chmas mulklari milliy ro‘yxatiga kiritilganini eslatib o‘tgan.
Eslatib o‘tamiz, 2020-yilda Jemchug House ta’sischisi va direktori Timur To‘raqulov uy madaniy meros sifatida qabul qilinadigan bo‘lsa, Madaniyat vazirligidan 10 milliard so‘m miqdorida kompensatsiya talab qilishi yuzasidan Bosh prokuraturaga ariza bilan murojaat qilgandi.
Izoh (0)