Prezidentning tegishli qaroriga ko‘ra, Vahobjon Rajabov xalq ta’limi vaziri o‘rinbosari etib tayinlandi. Bu haqda vazirlik matbuot xizmati xabar berdi.
Vahobjon Rajabov 1971-yilda Namangan viloyatida tug‘ilgan. Namangan davlat universitetini tugatgan.
U turli yillarda Namangan viloyati xalq ta’limi tizimida turli boshqaruv lavozimlarida faoliyat olib borgan. Jumladan, davlat ixtisoslashtirilgan maktab-internati direktori, Namangan viloyati xalq ta’limi boshqarmasi Tashxis markazi rahbari, Namangan viloyati xalq ta’limi boshqarmasi boshlig‘i lavozimlarida faoliyat yuritgan.
“Sodiq xizmatlari uchun” medali bilan taqdirlangan.
Tayinlovga qadar Vahobjon Rajabov Farg‘ona viloyati xalq ta’limi xodimlarini qayta tayyorlash va ularning malakasini oshirish hududiy markazi direktori lavozimida ishlab kelgan.
Avvalroq Vazirlar Mahkamasining qarori bilan Qahramon Ibodullayev Toshkent shahridagi A.I.Gersen nomidagi Rossiya davlat pedagogika universiteti Federal davlat budjeti oliy ta’lim muassasasi filiali ijrochi direktori etib, Nozim To‘ychiboyev Andijon iqtisodiyot va qurilish instituti rektori etib tayinlangani, shuningdek, Bahodirjon Shermuhammadov Farg‘ona davlat universiteti rektori etib, Dilnoza Xo‘jayeva Qo‘qon davlat pedagogika instituti rektori etib tayinlangani haqida xabar berilgan edi.
Izoh (0)