Ijtimoiy tarmoqlarda Ekologiya qo‘mitasi qirilib ketish arafasidagi Amudaryo katta kurakburunini ovlashga ruxsat bergani haqida xabarlar tarqaldi. Davlat ekologiya qo‘mitasi bunga rasmiy munosabat bildirdi.
Qo‘mitaning bildirishicha, “O‘zbekiston Qizil kitobi”ga kiritilgan kamyob va yo‘qolib borayotgan yovvoyi hayvon turlarini tabiiy yashash muhitidan ajratib olishga “Ov qilish va ovchilik xo‘jaligi to‘g‘risida” qonunining qoidalariga muvofiq alohida tartibda, Fanlar akademiyasining xulosasi inobatga olingan holda hamda Vazirlar Mahkamasining qarori asosida Ekologiya va atrof-muhitni muhofaza qilish davlat qo‘mitasi tomonidan beriladigan ruxsatnoma asosida yo‘l qo‘yilishi mumkin.
Fanlar akademiyasining 2020-yil 4-dekabrdagi xulosasiga muvofiq, “Qizil kitob”ga kiritilgan 10 dona Amudaryo katta kurakburun baliq turiga kvota ajratilgan. Ushbu ajratilgan kvota yuridik shaxs tomonidan ko‘paytirish va kelajakda ma’lum bir qismini respublikaning tabiiy suv havzalariga qo‘yib yuborish maqsadida so‘ralgan.
Biroq xabarda qayd etishicha, bugungi kunga qadar ajratilgan 10 dona Amudaryo katta kurakburun baliq turini ovlashga ruxsat berish bo‘yicha ariza kelib tushmagan. Shu sababli hech kimga ruxsatnoma ham rasmiylashtirilmagan.
“‘O‘zbekiston Qizil kitobi’ga kiritilgan yovvoyi hayvon turlarini saqlab qolish, ko‘paytirish maqsadida ularni tabiiy yashash muhitlarida va sun’iy tashkil etilgan pitomniklarda ko‘paytirish, shuningdek, qayta yetishtirish ishlarini amalga oshirish lozim.
Davlat ekologiya qo‘mitasi yovvoyi hayvonlarni, ayniqsa, ‘Qizil kitob’ga kiritilgan hayvonlarni ko‘paytirish va tabiiy yashash muhitiga qo‘yib yuborish bilan shug‘ullanuvchi, mamlakatimiz faunasini saqlab qolishga o‘z hissasini qo‘shib kelayotgan yuridik va jismoniy shaxslarni qo‘llab-quvvatlaydi”, — deyiladi qo‘mita xabarida.
Shuningdek, tarqalgan xabarlardagi “shu yilning ikki oyida baliqning 50 dan ortig‘i ovlangan”i to‘g‘risidagi aniq dalillar Davlat ekologiya qo‘mitasiga taqdim etilsa, huquqbuzar shaxslarga nisbatan barcha zarur choralar ko‘rilishi ma’lum qilingan.
May oyining oxirlarida Qashqadaryo viloyatining Mirishkor tumanida joylashgan Sechanko‘lda noqonuniy baliq ovlagan shaxslar tabiatga 45 million so‘m zarar keltirgani haqida xabar berilgandi. Jizzaxda ham mart va aprel oylarida baliqlarni noqonuniy ovlagan shaxslar aniqlangandi.
Shuningdek, Qoraqalpog‘istonda “Qizil kitob”ga kiritilgan 11 bosh jayronni ovlagan shaxslar, Qashqadaryoda “Qizil kitob”ga kiritilgan 700 ga yaqin toshbaqani olib ketayotgan brakonyerlar ushlangani ma’lum qilingandi. Toshkent viloyatida rossiyalik ovchi “O‘zbekiston Qizil kitobi”iga kiritilgan Tyanshan qo‘ng‘ir ayig‘ini Ekologiya qo‘mitasi rahbari ruxsati bilan otib o‘ldirgani esa mahalliy jamoatchilikning keng muhokamalariga sabab bo‘lgandi.
Izoh (0)