Toshkent viloyatida rossiyalik ovchi “O‘zbekiston Qizil kitobi”iga kiritilgan Tyanshan qo‘ng‘ir ayig‘ini Ekologiya qo‘mitasi rahbari ruxsati bilan otib o‘ldirgani mahalliy jamoatchilikning keng muhokamalariga sabab bo‘lgan edi. Unda yana bitta Tyanshan qo‘ng‘ir ayig‘ini otishga ruxsatnoma bor edi. Ekologiya va atrof-muhitni muhofaza qilish davlat qo‘mitasi vakili jamoatchilik e’tirozi inobatga olinib, ovchiga ikkinchi ayiqni otishga ruxsat berilmasligini ma’lum qildi.

Foto: Telegram / @ekologuz

Ekologiya va atrof-muhitni muhofaza qilish davlat qo‘mitasi Bioxilma-xillik va muhofaza qilinadigan tabiiy hududlar masalalari bo‘yicha bosh boshqarma boshlig‘i Abdurashid Sodiqovning so‘zlariga ko‘ra, rossiyalik ovchi Ye.P.Shirokovga qo‘mita tomonidan ov qilish uchun ruxsatnoma 2021-yilning 3-martdan 31-dekabr kunigacha berilgan. 2021-yil “Qizil kitob”ga kiritilgan qo‘ng‘ir ayiqni ovlash uchun ajratilgan kvotadagi 2 ta ayiqqa ariza Rossiya fuqarosi Ye.P.Shirokovdan kelib tushganligi uchun ham ruxsatnoma unga berilgan.

“Kvotadagi ikkinchi ayiq o‘rnatilgan tartibda, ya’ni qonun ustuvorligidan kelib chiqqan holda ko‘rilib, bo‘lib o‘tgan jamoatchilik e’tirozi inobatga olinib, ikkinchi ayiqni otishga ruxsat berilmaydi”, — deb ta’kidlagan u.

Eslatib o‘tamiz, ovchi Tyanshan qo‘ng‘ir ayig‘ini ov qilish uchun tegishli tartibda pul to‘lagan. “Ov qilish va ovchilik xo‘jaligi to‘g‘risida”gi qonunga ko‘ra, uning miqdori xorijlik fuqarolarga 3 ming AQSh dollari miqdorida belgilangan.