Navoiy viloyati Navbahor tumanida aholi vakillari Qalqonota qishlog‘i markazidan o‘tuvchi yo‘lni to‘sishga urindi, deya xabar bermoqda Ichki ishlar vazirligi.
Qayd etilishicha, 2021-yilning 10-iyun kuni Navoiy viloyati Navbahor tumanida fuqarolar tomonidan hududning Qalqonota qishlog‘i markazidan o‘tuvchi yo‘l fuqarolar tomonidan yopishga urinib, o‘z norozilik harakatlarida qatnashgan.
Ta’kidlanishicha, yo‘lda ko‘plar fuqarolar tomonidan amalga oshirilgan “mantiqsiz harakat” tumanning “Halovattepa” mahallasida yashovchi fuqaro S.Y. va M.A.ning noqonuniy xatti-harakati bilan bog‘liq.
Xususan, mazkur ikki fuqaro hech qanday qonuniy asoslarsiz ko‘p mahalliy aholining ishonchiga kirish orqali ularga tegishli qora mollar hamda turli ko‘rinishdagi moddiy qiymatliklarni qimmat narxda olib, ularga ikki uch oy ichida ma’lum miqdorda ko‘paytirib berishni va’da qiladi.
Olingan moddiy boyliklar va chorva mollarini esa yarim narxida boshqa fuqarolarga pullab, firibgarlik jinoyatini sodir etadi.
Mazkur harakat huquqni muhofaza qiluvchi organlar tomonidan atroflicha o‘rganilib, gumonlanuvchilarning xatti-harakatlarida jinoyat alomatlari borligi aniqlandi.
Navbahor tumani IIB tomonidan fuqarolar S.Y. va M.A. xonadonlarida belgilangan tartib asosida tintuv va surishtiruv ishlari o‘tkazildi. To‘plangan ma’lumotlar asosida ularga nisbatan jinoiy ish qo‘zg‘atilib, ehtiyot chorasi sifatida qamoqqa olindi.
Yo‘lni yopishga harakat qilib, boshqa fuqarolarni ham bunga da’vat qilgan shaxslar ichki ishlar xodimlari tomonidan alohida nazoratga olindi.
“Bizdan chorva olgan ikkisi qamalganini eshitdik. Bir ikkisidan telefon qilib so‘radim, endi (qamoqdan) chiqsa pul beradi, chiqmasa bermaydi, deyishdi. Keyin xalq nima qilsa to‘g‘ri qilayotgandir-da, deb qo‘shildik. Afsusdaman qilgan ishimdan. Qilgan ishimdan uyalyapman”, – deydi namoyishda qatnashgan ayol.
Navbahor tumani Jinoyat ishlari bo‘yicha sudi tomonidan namoyishda ishtirok etganlarning xatti-harakatlari yuzasidan sud jarayoni o‘tkazildi. Xabarda namoyishga chiqqanlardan biri 7 sutkaga qamalgani ma’lum qilingan.
Avvalroq Jizzaxda yuk ortish talablarini buzgan haydovchilar norozilik bildirib, xalqaro yo‘lni to‘sib qo‘ygani, Chiroqchida hokim va’dasini bajarmagani uchun “Afrosiyob” poyezd yo‘li to‘sib qo‘yilgani hamda Nukusda bir guruh ayollar yo‘lni to‘sib qo‘ygani haqida xabar berilgandi.
Izoh (0)