Ижтимоий тармоқларда Экология қўмитаси қирилиб кетиш арафасидаги Амударё катта куракбурунини овлашга рухсат бергани ҳақида хабарлар тарқалди. Давлат экология қўмитаси бунга расмий муносабат билдирди.
Қўмитанинг билдиришича, «Ўзбекистон Қизил китоби»га киритилган камёб ва йўқолиб бораётган ёввойи ҳайвон турларини табиий яшаш муҳитидан ажратиб олишга «Ов қилиш ва овчилик хўжалиги тўғрисида» қонунининг қоидаларига мувофиқ алоҳида тартибда, Фанлар академиясининг хулосаси инобатга олинган ҳолда ҳамда Вазирлар Маҳкамасининг қарори асосида Экология ва атроф-муҳитни муҳофаза қилиш давлат қўмитаси томонидан бериладиган рухсатнома асосида йўл қўйилиши мумкин.
Фанлар академиясининг 2020 йил 4 декабрдаги хулосасига мувофиқ, «Қизил китоб»га киритилган 10 дона Амударё катта куракбурун балиқ турига квота ажратилган. Ушбу ажратилган квота юридик шахс томонидан кўпайтириш ва келажакда маълум бир қисмини республиканинг табиий сув ҳавзаларига қўйиб юбориш мақсадида сўралган.
Бироқ хабарда қайд этишича, бугунги кунга қадар ажратилган 10 дона Амударё катта куракбурун балиқ турини овлашга рухсат бериш бўйича ариза келиб тушмаган. Шу сабабли ҳеч кимга рухсатнома ҳам расмийлаштирилмаган.
«‘Ўзбекистон Қизил китоби’га киритилган ёввойи ҳайвон турларини сақлаб қолиш, кўпайтириш мақсадида уларни табиий яшаш муҳитларида ва сунъий ташкил этилган питомникларда кўпайтириш, шунингдек, қайта етиштириш ишларини амалга ошириш лозим.
Давлат экология қўмитаси ёввойи ҳайвонларни, айниқса, ‘Қизил китоб’га киритилган ҳайвонларни кўпайтириш ва табиий яшаш муҳитига қўйиб юбориш билан шуғулланувчи, мамлакатимиз фаунасини сақлаб қолишга ўз ҳиссасини қўшиб келаётган юридик ва жисмоний шахсларни қўллаб-қувватлайди», — дейилади қўмита хабарида.
Шунингдек, тарқалган хабарлардаги «шу йилнинг икки ойида балиқнинг 50 дан ортиғи овланган»и тўғрисидаги аниқ далиллар Давлат экология қўмитасига тақдим этилса, ҳуқуқбузар шахсларга нисбатан барча зарур чоралар кўрилиши маълум қилинган.
Май ойининг охирларида Қашқадарё вилоятининг Миришкор туманида жойлашган Сечанкўлда ноқонуний балиқ овлаган шахслар табиатга 45 миллион сўм зарар келтиргани ҳақида хабар берилганди. Жиззахда ҳам март ва апрель ойларида балиқларни ноқонуний овлаган шахслар аниқланганди.
Шунингдек, Қорақалпоғистонда «Қизил китоб»га киритилган 11 бош жайронни овлаган шахслар, Қашқадарёда «Қизил китоб»га киритилган 700 га яқин тошбақани олиб кетаётган браконьерлар ушлангани маълум қилинганди. Тошкент вилоятида россиялик овчи «Ўзбекистон Қизил китоби»ига киритилган Тяншан қўнғир айиғини Экология қўмитаси раҳбари рухсати билан отиб ўлдиргани эса маҳаллий жамоатчиликнинг кенг муҳокамаларига сабаб бўлганди.
Изоҳ (0)