“Toshkent davlat yuridik universiteti qoshidagi akademik litseyning bitiruvchilari Toshkent davlat yuridik universitetiga yakka tartibda suhbat o‘tkazish orqali o‘qishga qabul qilish tartibi to‘g‘risidagi nizomni tasdiqlash haqida”gi buyruq Adliya vazirligida davlat ro‘yxatidan o‘tkazildi.
Nizomga ko‘ra, TDYU bakalavriatiga abituriyentlar qabul parametrlaridan tashqari TDYU tomonidan belgilanadigan o‘rinlar soniga mos ravishda qabul qilinib, to‘lov-kontrakt asosida o‘qiydi.
O‘qishga qabul qilish suhbat natijalariga ko‘ra, reyting tizimi bo‘yicha to‘plangan ballar asosida amalga oshiriladi. Bunda har yili 10-iyundan kechikmasdan maxsus komissiya tashkil etiladi. Bitiruvchilar har yili 20-iyundan kechikmasdan maxsus komissiyaga tavsiyanoma berishni so‘rab ariza bilan murojaat qiladi.
Maxsus komissiya faqat komissiya tashkil etilgan tegishli o‘quv yili bitiruvchilarining arizalarini ko‘rib chiqadi (20-iyundan boshlab 5 ish kunidan oshmagan muddatda).
Nizomga ko‘ra, har yili 1-iyuldan kechikmasdan suhbat komissiyasi tuzilib, yakka tartibdagi suhbat har yili 10–20-iyul kunlari o‘tkaziladi.
Suhbat natijalari reyting tizimi bo‘yicha abituriyentga qo‘yilgan (0 dan 100 gacha oraliqdagi) ballar asosida aniqlanadi. Suhbat jarayoni va natijalarini qayd etishda video va audioyozuvlardan foydalaniladi.
Natijalar TDYU rasmiy veb-saytida suhbat o‘tkazilgandan so‘ng keyingi ish kunida e’lon qilinadi. TDYU bakalavriatiga abituriyentlarni qabul qilish uchun yakka tartibdagi suhbatni qayta o‘tkazishga yo‘l qo‘yilmaydi.
Akademik litsey tomonidan berilgan tavsiyanoma ikki yil davomida amal qiladi. Mazkur tartib rasmiy e’lon qilingan kundan e’tiboran kuchga kiradi.
Bundan avval O‘zbekistonda bitiruvchilarning yakuniy imtihonlari Davlat test markazi tomonidan amalga oshirilishi hamda Toshkent davlat yuridik universitetiga kiritib qo‘yish uchun 10 ming dollar so‘ragan shaxs ushlangani haqida xabar berilgandi.
Izoh (0)