Samarqand viloyati Kattaqo‘rg‘on tumanida YPX inspektorlari Davlat soliq inspeksiyasi xodimini o‘ldirib qo‘ygani haqida xabarlar tarqaldi. Ichki ishlar vazirligi holat bo‘yicha rasmiy bayonot berib, bodikameralar olgan videoni e’lon qildi.
Qayd etilishicha, fuqaro A.A. boshqaruvidagi Cobalt rusumli avtotransport vositasi svetoforning qizil chirog‘idan to‘xtamasdan o‘tib, xodimlarning to‘xtash ishorasiga bo‘ysunmasdan, avtotransportda yuqori tezlikda harakatlanib yashirinmoqchi bo‘lganligi, shundan so‘ng yo‘l qatnov qismining o‘rtasida to‘xtab, haydovchi avtotransportni tashlagan holda piyoda qochishga uringanligini ma’lum qilgan.
Senat axborot xizmati ma’lum qilishicha, ushbu holat yuzasidan Kattaqo‘rg‘on tumani prokuraturasi tomonidan jinoyat ishi qo‘zg‘atilib, tergov harakatlari olib borilmoqda. Holat yuzasidan yakuniy xulosa tergov jarayonlari o‘z nihoyasiga yetgandan so‘ng ma’lum qilinadi.
“O‘zbekiston Oliy Majlisi Senatining Mudofaa va xavfsizlik masalalari qo‘mitasi mazkur holat bo‘yicha o‘rganish natijalarini keng ommaga e’lon qiladi. O‘z navbatida qo‘mita qonun buzilish holatining har qanday ko‘rinishiga murosasiz ekanligini bildiradi”, – deyiladi xabarda.
Eslatib o‘tamiz, Bosh prokuratura holat bo‘yicha Jinoyat kodeksining 206-moddasi (hokimiyat yoki mansab vakolati doirasidan chetga chiqish) bilan jinoyat ishi qo‘zg‘atilganini ma’lum qilgan.
Avvalroq Qashqadaryoda unashtirilgan yigit-qizni qo‘lga olib, ularni qo‘yib yuborish evaziga pul so‘ragan IIB xodimlari ishdan olingani, Qoraqalpog‘istonda haydovchiga qo‘l ko‘targan YPX xodimiga nisbatan xizmat tekshiruvi tayinlangani hamda Bo‘stonliqda Toshkent shahar IIBB xodimi ishtirokida YTH yuz bergani haqida xabar berilgandi.
Izoh (0)