Atom energiyasi bo‘yicha xalqaro agentlikning (MAGATE) yadroviy infratuzilmani kompleks ko‘rib chiqish missiyasi INIR (Integrated Nuclear Infrastructure Review)ning hisoblashicha, O‘zbekiston mamlakatda birinchi atom elektrostansiyasini qurish loyihasini ishlab chiqishda sezilarli darajada progressga erishgan. Bu haqda agentlik matbuot xizmatiga tayanib, “Gazeta.uz” xabar berdi.
MAGATE ma’lumotlariga ko‘ra, INIR missiyasi shu hafta hukumat taklifida ko‘ra O‘zbekistonda amalga oshirgan 12 kunlik missiyasini yakunlagan.
Ekspertlar guruhining ma’lum qilishicha, O‘zbekiston o‘z huquqiy-normativ bazasini takomillashtirish hamda nazorat organlarini mustahkamlash borasida choralar ko‘rgan.
Shuningdek, missiya O‘zbekistonning atom energetikasi dasturi davlat tomonidan yetarlicha qo‘llab-quvvatlanayotgani va ishonchlilik, xavfsizlik hamda tarqatmaslik borasida aniq sodiqligini namoyish etayotganini tasdiqlagan.
“Hukumat keyinchalik ham zarur huquqiy va institutsional bazani yanada rivojlantirishga e’tiborini yo‘naltirgan holda qolishi juda muhim hisoblanadi”, — deydi MAGATE yadroviy infratuzilma rivojlanish seksiyasi rahbari Milko Kovachev.
Xususan, O‘zbekiston hozirga qadar ishtirokchi bo‘lmagan xalqaro huquqiy hujjatlarga qo‘shilishi kerak: Yadroviy xavfsizlik haqida konvensiya, Yadroviy avariyadan tezkor ogohlantirish to‘g‘risidagi konvensiya, Yadroviy zarar uchun fuqarolik javobgarligi to‘g‘risidagi Vena konvensiyasi va uning protokoliga.
“O‘zbekiston INIR missiyasini qabul qilib, o‘zining yadroviy infratuzilmaga tayyorligini obyektiv ravishda professional baholashga to‘liq ochiqligi va manfaatdorligini namoyish etdi”, — deydi “O‘zatom” bosh direktori Jo‘rabek Mirzamahmudov.
Eslatib o‘tamiz, “2019—2029-yillarda O‘zbekiston Respublikada atom energetikasini rivojlantirish konsepsiyasini tasdiqlash to‘g‘risida”gi Prezident qaroriga ko‘ra, O‘zbekiston atom elektr stansiyasi qurilishini 2022-yildan erta boshlamaydi.
Hujjatga ko‘ra, mamlakatdagi ilk atom elektr stansiyasini barpo etish uch bosqichda amalga oshiriladi. Birinchi bosqich — 2019—2020-yillarda AES quriladigan joy aniqlanadi, 2020—2021-yillarda loyihaning texnik-iqtisodiy asosini ishlab chiqish rejalashtirilmoqda. 2022-yildan esa obyekt qurilishiga kirishiladi.
Izoh (0)