Атом энергияси бўйича халқаро агентликнинг (МАГАТЭ) ядровий инфратузилмани комплекс кўриб чиқиш миссияси INIR (Integrated Nuclear Infrastructure Review)нинг ҳисоблашича, Ўзбекистон мамлакатда биринчи атом электростанциясини қуриш лойиҳасини ишлаб чиқишда сезиларли даражада прогрессга эришган. Бу ҳақда агентлик матбуот хизматига таяниб, «Gazeta.uz» хабар берди.
МАГАТЭ маълумотларига кўра, INIR миссияси шу ҳафта ҳукумат таклифида кўра Ўзбекистонда амалга оширган 12 кунлик миссиясини якунлаган.
Экспертлар гуруҳининг маълум қилишича, Ўзбекистон ўз ҳуқуқий-норматив базасини такомиллаштириш ҳамда назорат органларини мустаҳкамлаш борасида чоралар кўрган.
Шунингдек, миссия Ўзбекистоннинг атом энергетикаси дастури давлат томонидан етарлича қўллаб-қувватланаётгани ва ишончлилик, хавфсизлик ҳамда тарқатмаслик борасида аниқ содиқлигини намойиш этаётганини тасдиқлаган.
«Ҳукумат кейинчалик ҳам зарур ҳуқуқий ва институционал базани янада ривожлантиришга эътиборини йўналтирган ҳолда қолиши жуда муҳим ҳисобланади», — дейди МАГАТЭ ядровий инфратузилма ривожланиш секцияси раҳбари Милко Ковачев.
Хусусан, Ўзбекистон ҳозирга қадар иштирокчи бўлмаган халқаро ҳуқуқий ҳужжатларга қўшилиши керак: Ядровий хавфсизлик ҳақида конвенция, Ядровий авариядан тезкор огоҳлантириш тўғрисидаги конвенция, Ядровий зарар учун фуқаролик жавобгарлиги тўғрисидаги Вена конвенцияси ва унинг протоколига.
«Ўзбекистон INIR миссиясини қабул қилиб, ўзининг ядровий инфратузилмага тайёрлигини объектив равишда профессионал баҳолашга тўлиқ очиқлиги ва манфаатдорлигини намойиш этди», — дейди «Ўзатом» бош директори Жўрабек Мирзамаҳмудов.
Эслатиб ўтамиз, «2019—2029 йилларда Ўзбекистон Республикада атом энергетикасини ривожлантириш концепциясини тасдиқлаш тўғрисида»ги Президент қарорига кўра, Ўзбекистон атом электр станцияси қурилишини 2022 йилдан эрта бошламайди.
Ҳужжатга кўра, мамлакатдаги илк атом электр станциясини барпо этиш уч босқичда амалга оширилади. Биринчи босқич — 2019—2020 йилларда АЭС қуриладиган жой аниқланади, 2020—2021 йилларда лойиҳанинг техник-иқтисодий асосини ишлаб чиқиш режалаштирилмоқда. 2022 йилдан эса объект қурилишига киришилади.
Изоҳ (0)