O‘zbekistonda necha kishi koronavirusga qarshi vaksinalarning barcha bosqichlarida emlangani ma’lum qilindi. Bu haqda Sog‘liqni saqlash vazirligi matbuot xizmati rahbari Furqat Sanayev ma’lumot berdi.
“‘Sputnik V’ va AstraZeneca vaksinalari ikki bosqichli emlanish bilan inson organizmida yuqori darajada immunitet hosil qilinishiga yordam beradi.
ZF-UZ-VAC2001 vaksinasida esa to‘liq uch bosqichda emlangandan so‘ng inson organizmida yetarlicha antitana hosil bo‘lishiga erishish mumkin.
O‘zbekistonda koronavirusga qarshi emlash jarayonlari boshlanganiga ikki oy bo‘ldi. Vaksinalarni mamlakatga keltirish va emlash jarayonlarining borishi haqida vazirlik matbuot xizmati tomonidan davomli xabarlar berib borilmoqda.
Ushbu xabarlarni tahlil qilganimizda, ikki oy mobaynida 2 million 69 ming 518 doza vaksina qo‘llanilgan bo‘lsa, shundan 348 ming 302 nafar kishi to‘liq bosqichlarda emlanib bo‘lindi”, – deydi Furqat Sanayev.
Ma’lum qilinishicha, bunga qadar:
- AstraZeneca bilan 321 ming 906 nafar kishi,
- ZF-UZ-VAC2001 bilan 494 nafar kishi,
- “Sputnik V” vaksinasi bilan esa 25 ming 902 nafar kishi barcha bosqichlarda to‘liq emlangan.
Bundan avval maktabgacha ta’lim vaziri koronavirusga qarshi emlangani, Zafar Hoshimov koronavirusga qarshi emlandi va boshqalarga ham buni tavsiya qilgani hamda O‘zbekistonga yana 70 ming doza “Sputnik V” vaksinasi olib kelingani haqida xabar berilgandi.
Izoh (0)