Turkiya Qora dengizdan yangi tabiiy gaz konini topdi. Hozir Anqara rasmiy bayonot tayyorlamoqda. Bu haqda Bloomberg xabar berdi.
Nashrning qayd etishicha, dastlabki ma’lumotlarga ko‘ra, yangi Amasra-1 konida tabiiy gazning juda katta zaxirasi bor.
“Shu bilan birga, mamlakat rasmiylari Qora dengizda yangi topilgan konlarning birortasida audit o‘tkazmadi”, — deb yozmoqda.
Turkiya Energetika vazirligi yangi topilgan kon haqida izoh bermagan. Lekin nashrning ta’kidlashicha, mamlakat prezidenti Rajab Toyyib Erdo‘g‘on hafta boshida bergan intervyusida juma kuni Qora dengiz sohilidan “xushxabar” olib kelishni va’da bergan.
Prezident Erdo‘g‘on bu sohdagi kashfiyotlarni mamlakatning iqtisodiy zaifliklarini yechim topish yo‘li deb biladi. Bunday muammolar qatoriga chet el valyutasida to‘lash kerak bo‘lgan energiya resurslarining importi ham kiradi, deb yozmoqda nashr.
2020-yilning avgust oyida davlat rahbari Rajab Toyyib Erdo‘g‘on Turkiyaning Qora dengizda yirik tabiiy gaz konlarini aniqlaganini ma’lum qilgan edi. Konning zaxirasi 320 milliard kub metrga baholanmoqda. G‘arb OAV ma’lumotlariga ko‘ra, bunday gaz hajmi Turkiyaning 20 yil davomida resurslarga bo‘lgan ehtiyojini qoplaydi. Turkiya energetika va tabiiy resurslar vazirining ta’kidlashicha, gaz qazib olish 2023-yildan boshlanishi mumkin. Jami 30-40 ta quduq qazish rejalashtirilgan.
Shuningdek, 2020-yilda turkiyalik georazvedkachilar “Tuna-1” qudug‘idan 405 milliard kub metr tabiiy gaz zaxirasini topgan edi. Bu Qora dengizdagi eng yirik kon bo‘ldi. Bu konda ham qazib olish ishlari 2023-yilda boshlanishi mumkin.
Avvalroq Rajab Toyyib Erdo‘g‘on foiz stavkalarini pasaytirish zarurligini takrorlaganidan keyin turk lirasi 2-iyun kuni uch foizga qadrsizlangani haqida xabar berildi.
Shuningdek, Erdo‘g‘on mamlakat markaziy banki rahbari Nasi Agbalni ishdan bo‘shatib, turk lirasining qadrsizlanishiga sabab bo‘ldi. Bir kun davomida milliy valyuta 14 foizga qadrsizlanib, bir dollar uchun 8,35 liragacha arzonlashgani ma’lum bo‘ldi.
Izoh (0)