Туркия Қора денгиздан янги табиий газ конини топди. Ҳозир Анқара расмий баёнот тайёрламоқда. Бу ҳақда Bloomberg хабар берди.
Нашрнинг қайд этишича, дастлабки маълумотларга кўра, янги Амасра-1 конида табиий газнинг жуда катта захираси бор.
«Шу билан бирга, мамлакат расмийлари Қора денгизда янги топилган конларнинг бирортасида аудит ўтказмади», — деб ёзмоқда.
Туркия Энергетика вазирлиги янги топилган кон ҳақида изоҳ бермаган. Лекин нашрнинг таъкидлашича, мамлакат президенти Ражаб Тоййиб Эрдўғон ҳафта бошида берган интервьюсида жума куни Қора денгиз соҳилидан «хушхабар» олиб келишни ваъда берган.
Президент Эрдўғон бу соҳдаги кашфиётларни мамлакатнинг иқтисодий заифликларини ечим топиш йўли деб билади. Бундай муаммолар қаторига чет эл валютасида тўлаш керак бўлган энергия ресурсларининг импорти ҳам киради, деб ёзмоқда нашр.
2020 йилнинг август ойида давлат раҳбари Ражаб Тоййиб Эрдўғон Туркиянинг Қора денгизда йирик табиий газ конларини аниқлаганини маълум қилган эди. Коннинг захираси 320 миллиард куб метрга баҳоланмоқда. Ғарб ОАВ маълумотларига кўра, бундай газ ҳажми Туркиянинг 20 йил давомида ресурсларга бўлган эҳтиёжини қоплайди. Туркия энергетика ва табиий ресурслар вазирининг таъкидлашича, газ қазиб олиш 2023 йилдан бошланиши мумкин. Жами 30-40 та қудуқ қазиш режалаштирилган.
Шунингдек, 2020 йилда туркиялик георазведкачилар «Туна-1» қудуғидан 405 миллиард куб метр табиий газ захирасини топган эди. Бу Қора денгиздаги энг йирик кон бўлди. Бу конда ҳам қазиб олиш ишлари 2023 йилда бошланиши мумкин.
Аввалроқ Ражаб Тоййиб Эрдўғон фоиз ставкаларини пасайтириш зарурлигини такрорлаганидан кейин турк лираси 2 июнь куни уч фоизга қадрсизлангани ҳақида хабар берилди.
Шунингдек, Эрдўғон мамлакат марказий банки раҳбари Наси Агбални ишдан бўшатиб, турк лирасининг қадрсизланишига сабаб бўлди. Бир кун давомида миллий валюта 14 фоизга қадрсизланиб, бир доллар учун 8,35 лирагача арзонлашгани маълум бўлди.
Изоҳ (0)