Samarqand shahrida o‘zini ko‘p qavatli uydan tashlamoqchi bo‘lgan 19 yoshli ayol to‘xtatib qolindi, deya xabar bermoqda Milliy gvardiya matbuot xizmati.
Ma’lum qilinishicha, 2021-yilning 3-iyun kuni soat 10:10 lar atrofida Samarqand shahrining “Shodlik” mahallasi, S.Buxoriy ko‘chasida joylashgan uyda mojaro bo‘layotgani haqida “Shodlik” MFYga xonadon qo‘shnilari tomonidan murojaat kelib tushgan.
Voqea joyiga zudlik bilan mahalla vakillari hamda unga biriktirilgan Milliy gvardiya Samarqand viloyati bo‘yicha boshqarmasi harbiy xizmatchisi, psixolog kichik serjant N.S.lar yetib borishgan va er-xotin — U.N. va B.D. o‘rtasida jiddiy mojaro bo‘layotganiga guvoh bo‘lgan.
Oilaning psixologik holati og‘ir ekani natijasida U.N.ning turmush o‘rtog‘i B.D. o‘z joniga qasd qilish maqsadida yashab turgan uyining 3-qavatidan o‘zini pastga tashlamoqchi bo‘lgani aniqlangan.
Tezkor olib borilgan qutqaruv ishlari natijasida Milliy gvardiya harbiy xizmatchisi tomonidan 2002-yilda tug‘ilgan B.D.ning hayoti saqlab qolingan.
Voqea yuzasidan xonadon egalari bilan profilaktik tushuntirish ishlari olib borilgan. O‘z joniga qasd qilmoqchi bo‘lgan ayol qilgan ishidan qattiq afsusda ekani aytilmoqda.
Bundan avval Nukusda o‘zini kanalga tashlagan 16 yoshli qiz qutqarilgani, Qashqadaryoda 11-sinf o‘quvchisi uyidagi molxonadan osilgan holda topilgani hamda Toshkentda eri bilan janjallashgan ayol elektr uzatish ustuniga chiqib, joniga qasd qilmoqchi bo‘lgani haqida xabar berilgandi.
Izoh (0)