Самарқанд шаҳрида ўзини кўп қаватли уйдан ташламоқчи бўлган 19 ёшли аёл тўхтатиб қолинди, дея хабар бермоқда Миллий гвардия матбуот хизмати.
Маълум қилинишича, 2021 йилнинг 3 июнь куни соат 10:10 лар атрофида Самарқанд шаҳрининг «Шодлик» маҳалласи, С.Бухорий кўчасида жойлашган уйда можаро бўлаётгани ҳақида «Шодлик» МФЙга хонадон қўшнилари томонидан мурожаат келиб тушган.
Воқеа жойига зудлик билан маҳалла вакиллари ҳамда унга бириктирилган Миллий гвардия Самарқанд вилояти бўйича бошқармаси ҳарбий хизматчиси, психолог кичик сержант Н.С.лар етиб боришган ва эр-хотин — У.Н. ва Б.Д. ўртасида жиддий можаро бўлаётганига гувоҳ бўлган.
Оиланинг психологик ҳолати оғир экани натижасида У.Н.нинг турмуш ўртоғи Б.Д. ўз жонига қасд қилиш мақсадида яшаб турган уйининг 3-қаватидан ўзини пастга ташламоқчи бўлгани аниқланган.
Тезкор олиб борилган қутқарув ишлари натижасида Миллий гвардия ҳарбий хизматчиси томонидан 2002 йилда туғилган Б.Д.нинг ҳаёти сақлаб қолинган.
Воқеа юзасидан хонадон эгалари билан профилактик тушунтириш ишлари олиб борилган. Ўз жонига қасд қилмоқчи бўлган аёл қилган ишидан қаттиқ афсусда экани айтилмоқда.
Бундан аввал Нукусда ўзини каналга ташлаган 16 ёшли қиз қутқарилгани, Қашқадарёда 11-синф ўқувчиси уйидаги молхонадан осилган ҳолда топилгани ҳамда Тошкентда эри билан жанжаллашган аёл электр узатиш устунига чиқиб, жонига қасд қилмоқчи бўлгани ҳақида хабар берилганди.
Изоҳ (0)