Qashqadaryo viloyatining Kitob tumanida tadbirkor faoliyatini maxsus guvohnomasiz tekshirgan soliq xodimi javobgarlikka tortildi. Bu haqda “Daryo”ga Biznes-ombudsman devonining Qashqadaryo viloyatida faoliyat ko‘rsatuvchi mas’uli Sheroz Shodiyev ma‘lum qildi.
Ta’kidlanishicha, Kitob tuman davlat soliq inspeksiyasi bosh inspektori U.T. maxsus guvohnomaga ega bo‘lmagan holda inspeksiyaning 2020-yil 25-sentabrdagi buyrug‘ini asos qilib, “Ko‘zgu” MChJda (tadbirkorlik subyektining nomi o‘zgartirilgan) kameral soliq tekshiruvi o‘tkazgan.
“Soliq kodeksining 137-moddasiga ko‘ra kameral soliq tekshiruvi soliq tekshiruvlari turlariga kiradi. Qayd qilingan qonun buzilish holati yuzasidan Biznes-ombudsman devoni xodimlari tomonidan Kitob tuman davlat soliq inspeksiyasi xodimi U.T.ga nisbatan ma’muriy bayonnoma rasmiylashtirildi. Va Jinoyat ishlari bo‘yicha Kitob tuman sudining 2021-yil 31-maydagi qarori bilan huquqbuzarga nisbatan 2 million 450 ming so‘m jarima jazosi qo‘llanildi”, — deydi Sheroz Shodiyev.
Biznes-ombudsman devonining viloyatda faoliyat ko‘rsatuvchi mas’uliga ko‘ra, amaldagi qonunchilik hujjatlarida tadbirkorlik subyektlari faoliyatida o‘tkaziladigan tekshirishlar uchun talablar belgilangan. Jumladan, “Xo‘jalik yurituvchi subyektlar faoliyatini davlat tomonidan nazorat qilish to‘g‘risida”gi qonunning 6-moddasiga muvofiq nazorat qiluvchi organlar mansabdor shaxslarining xo‘jalik yurituvchi subyektlar faoliyatini tekshirishiga ruxsat berilgani to‘g‘risidagi maxsus guvohnoma mavjud bo‘lgandagina yo‘l qo‘yiladi.
Eslatib o‘tamiz, avvalroq davlat Soliq qo‘mitasi Toshkentda tadbirkorga jarima solgan soliqchining o‘zi jarima to‘laydigan bo‘ldi mazmunidagi maqolaga munosabat bildirib, sud qarorida ko‘rsatilgan vajlar noto‘g‘ri ekanini, hozirda sudning mazkur qarori ustidan Jinoyat ishlari bo‘yicha Toshkent shahar sudiga apellyatsiya shikoyati kiritilganini xabar bergandi. Shuningdek, kameral soliq tekshiruvini o‘tkazish uchun xodim maxsus guvohnomaga ega bo‘lishi lozimligi haqidagi talab qonunchilik hujjatlarida mavjud emasligini eslatgandi.
Izoh (0)