4-iyun kuni soat 22:16 da Talimarjon IES energobloki avariyaviy to‘xtagani sababli “O‘zbekneftgaz” obyektlarida elektr uzilishi kuzatildi. Bu haqda kompaniya matbuot xizmati xabar berdi.
Natijada Sho‘rtan gaz kimyo majmuasi, Muborak gazni qayta ishlash zavodi, Buxoro neftni qayta ishlash zavodlarining asosiy ishlab chiqarish qurilmalari ish faoliyati to‘xtab qolgan.
Bundan tashqari, Muborak, Sho‘rtan, Gazli neft va gaz qazib chiqarish boshqarmalariga qarashli gaz qazib chiqarish konlarida elektr energiyasi uzilishi sababli ishda to‘xtalish ro‘y bergan.
“Zevarda”, “Janubiy Kemachi”, “Janubiy O‘rtabuloq”, “Dengizko‘l”, “Somontepa”, “Alan” va “Ko‘kdumaloq”, “Sho‘rtan KMPO”, “Betman”, “Shimoliy Nishon” siquv kompressor stansiyalari ham to‘liq to‘xtab qolgan.
“Yuz bergan to‘xtalishlar “O‘ztransgaz” AJga qarashli magistral gaz quvurlariga yetkazib berilayotgan tabiiy gaz sarfi kamayishiga olib kelmoqda”, — deyiladi bayonotda.
Ta’kidlanishicha, hozirda “O‘zbekneftgaz” AJ, “Hududiy elektr tarmoqlari” AJ hamda “Milliy elektr tarmoqlari” AJning tegishli mutaxassislari hamkorligida yuzaga kelgan holatni bartaraf etish bo‘yicha tezkor ishlarni amalga oshirilmoqda.
Eslatib o‘tamiz, 2021-yilning yanvarida Markaziy Osiyo va Qozog‘istonni bog‘lovchi yagona energetik tizimning elektr uzatish tarmoqlarida rejadan tashqari sodir bo‘lgan uzilishlar sababli avariyaga qarshi avtomatika ishlab ketgandi. O‘shanda Talimarjon IESning umumiy quvvati 900 megavatt bo‘lgan ikkita BGQlari o‘chirilgan. Buning natijasida Markaziy Osiyoning yagona energiya tizimini (YaET) Rossiya va Qozog‘istonning yagona energiya tizimi bilan bog‘laydigan tranzit tarmoqlarida yuklama keskin ko‘tarilgan.
Izoh (0)