Қашқадарё вилоятининг Китоб туманида тадбиркор фаолиятини махсус гувоҳномасиз текширган солиқ ходими жавобгарликка тортилди. Бу ҳақда «Дарё»га Бизнес-омбудсман девонининг Қашқадарё вилоятида фаолият кўрсатувчи масъули Шероз Шодиев маълум қилди.
Таъкидланишича, Китоб туман давлат солиқ инспекцияси бош инспектори У.Т. махсус гувоҳномага эга бўлмаган ҳолда инспекциянинг 2020 йил 25 сентябрдаги буйруғини асос қилиб, «Кўзгу» МЧЖда (тадбиркорлик субъектининг номи ўзгартирилган) камерал солиқ текшируви ўтказган.
«Солиқ кодексининг 137-моддасига кўра камерал солиқ текшируви солиқ текширувлари турларига киради. Қайд қилинган қонун бузилиш ҳолати юзасидан Бизнес-омбудсман девони ходимлари томонидан Китоб туман давлат солиқ инспекцияси ходими У.Т.га нисбатан маъмурий баённома расмийлаштирилди. Ва Жиноят ишлари бўйича Китоб туман судининг 2021 йил 31 майдаги қарори билан ҳуқуқбузарга нисбатан 2 миллион 450 минг сўм жарима жазоси қўлланилди», — дейди Шероз Шодиев.
Бизнес-омбудсман девонининг вилоятда фаолият кўрсатувчи масъулига кўра, амалдаги қонунчилик ҳужжатларида тадбиркорлик субъектлари фаолиятида ўтказиладиган текширишлар учун талаблар белгиланган. Жумладан, «Хўжалик юритувчи субъектлар фаолиятини давлат томонидан назорат қилиш тўғрисида»ги қонуннинг 6-моддасига мувофиқ назорат қилувчи органлар мансабдор шахсларининг хўжалик юритувчи субъектлар фаолиятини текширишига рухсат берилгани тўғрисидаги махсус гувоҳнома мавжуд бўлгандагина йўл қўйилади.
Эслатиб ўтамиз, аввалроқ давлат Солиқ қўмитаси Тошкентда тадбиркорга жарима солган солиқчининг ўзи жарима тўлайдиган бўлди мазмунидаги мақолага муносабат билдириб, суд қарорида кўрсатилган важлар нотўғри эканини, ҳозирда суднинг мазкур қарори устидан Жиноят ишлари бўйича Тошкент шаҳар судига апелляция шикояти киритилганини хабар берганди. Шунингдек, камерал солиқ текширувини ўтказиш учун ходим махсус гувоҳномага эга бўлиши лозимлиги ҳақидаги талаб қонунчилик ҳужжатларида мавжуд эмаслигини эслатганди.
Изоҳ (0)