Ijtimoiy tarmoqlarda Toshkent tumani “Chuvalachi” mahallasi Gulyashnar ko‘chasida 19 yoshli yigitni transformator toki urishi oqibatida vafot etgani aytilgan xabarlar tarqaldi. Bosh prokuratura voqea yuzasidan “Daryo”ga ma’lumot berdi.
Jinoyat ishi hujjatlariga ko‘ra, 1984-yilda Toshkent tumanida tug‘ilgan S.S. Toshkent tumani “Elektr ta’minoti” korxonasi “Keles” ustachilik bo‘limi katta ustasi lavozimida ishlab kelib, egallab turgan lavozimiga ko‘ra mansabdor shaxs bo‘la turib, “Chuvalachi” mahalla raisi va fuqarolari tomonidan Toshkent tumani, Chuvalachi hududi, Gulyashnar ko‘chasida joylashgan transformatorga temir panjara ulanganligi va undan tok chiqayotganligi to‘g‘risida bir necha marotaba og‘zaki xabar berilgan bo‘lsa-da, ushbu og‘zaki xabarlarni tekshirmasdan nazoratsiz qoldirgan.
S.S. O‘ziga yuklatilgan vazifalarga loqaydlik bilan qarab, ularni lozim darajada bajarmaganligi oqibatida 2021-yil 6-may kuni soat 11:00 larda 2002-yilda tug‘ilgan X.T. transformatorga ulangan temir panjarani ushlagan vaqtida temir panjaradan chiqqan tok urib, hodisa joyida vafot etgan.
Sudga oid tibbiy ekspertizasining 2021-yil 6-maydagi 83-T-sonli ma’lumotnomasiga ko‘ra X.T.da ko‘krak qafasi o‘ng yonbosh yuzasi, o‘ng yelka o‘rta uchligi sohasi elektrotamg‘alari kabi tashqi tan jarohatlari aniqlangani, uning o‘limiga elektrojarohat, texnik elektr tokining fibrilyatsion ta’siri yuzasidan kelib chiqqan yurak faoliyatining o‘tkir yetishmovchiligi, o‘ng o‘pka plevriti sabab bo‘lganligi ko‘rsatilgan.
“O‘zenergoinspeksiya” Toshkent viloyati hududiy bo‘limi tomonidan berilgan xizmat tekshiruvi xulosasiga ko‘ra, yuqorida aytilgan transformator punktiga xizmat ko‘rsatishda Toshkent tuman elektr ta’minoti korxonasining “Keles” ustachilik bo‘limi ustasi S.S. tomonidan Vazirlar Mahkamasining 2018-yil 26-dekabrdagi 1050-sonli qarori bilan tasdiqlangan “Elektr tarmog‘i xo‘jaligi obyektlarini muhofaza qilish qoidalari”, “O‘zbekiston Respublikasi elektr stansiyalari va tarmoqlari texnik ekspluatatsiya qilish qoidalari” va “Elektr uskunalarining tuzilishi” qoidalari talablarini bajarishda mas’uliyatsizlikka yo‘l qo‘yganligi aniqlangan.
Holat bo‘yicha Jinoyat kodeksining 207-moddasi (mansabga sovuqqonlik bilan qarash) bilan jinoyat ishi qo‘zg‘atildi.
Hozirgi kunda dastlabki tergov harakatlari olib borilmoqda.
Bundan avval Toshkentda poyezd ustida selfi qilmoqchi bo‘lgan 18 yoshli yigitni 27 ming voltli tok urgani hamda Toshkentda 8 yoshli qizaloq elektr toki urishi oqibatida vafot etgani haqida xabar berilgandi.
Izoh (0)