Ижтимоий тармоқларда Тошкент тумани «Чувалачи» маҳалласи Гуляшнар кўчасида 19 ёшли йигитни трансформатор токи уриши оқибатида вафот этгани айтилган хабарлар тарқалди. Бош прокуратура воқеа юзасидан «Дарё»га маълумот берди.
Жиноят иши ҳужжатларига кўра, 1984 йилда Тошкент туманида туғилган С.С. Тошкент тумани «Электр таъминоти» корхонаси «Келес» устачилик бўлими катта устаси лавозимида ишлаб келиб, эгаллаб турган лавозимига кўра мансабдор шахс бўла туриб, «Чувалачи» маҳалла раиси ва фуқаролари томонидан Тошкент тумани, Чувалачи ҳудуди, Гуляшнар кўчасида жойлашган трансформаторга темир панжара уланганлиги ва ундан ток чиқаётганлиги тўғрисида бир неча маротаба оғзаки хабар берилган бўлса-да, ушбу оғзаки хабарларни текширмасдан назоратсиз қолдирган.
С.С. Ўзига юклатилган вазифаларга лоқайдлик билан қараб, уларни лозим даражада бажармаганлиги оқибатида 2021 йил 6 май куни соат 11:00 ларда 2002 йилда туғилган Х.Т. трансформаторга уланган темир панжарани ушлаган вақтида темир панжарадан чиққан ток уриб, ҳодиса жойида вафот этган.
Судга оид тиббий экспертизасининг 2021 йил 6 майдаги 83-Т-сонли маълумотномасига кўра Х.T.да кўкрак қафаси ўнг ёнбош юзаси, ўнг елка ўрта учлиги соҳаси электротамғалари каби ташқи тан жароҳатлари аниқлангани, унинг ўлимига электрожароҳат, техник электр токининг фибриляцион таъсири юзасидан келиб чиққан юрак фаолиятининг ўткир етишмовчилиги, ўнг ўпка плеврити сабаб бўлганлиги кўрсатилган.
«Ўзэнергоинспекция» Тошкент вилояти ҳудудий бўлими томонидан берилган хизмат текшируви хулосасига кўра, юқорида айтилган трансформатор пунктига хизмат кўрсатишда Тошкент туман электр таъминоти корхонасининг «Келес» устачилик бўлими устаси С.С. томонидан Вазирлар Маҳкамасининг 2018 йил 26 декабрдаги 1050-сонли қарори билан тасдиқланган «Электр тармоғи хўжалиги объектларини муҳофаза қилиш қоидалари», «Ўзбекистон Республикаси электр станциялари ва тармоқлари техник эксплуатация қилиш қоидалари» ва «Электр ускуналарининг тузилиши» қоидалари талабларини бажаришда масъулиятсизликка йўл қўйганлиги аниқланган.
Ҳолат бўйича Жиноят кодексининг 207-моддаси (мансабга совуққонлик билан қараш) билан жиноят иши қўзғатилди.
Ҳозирги кунда дастлабки тергов ҳаракатлари олиб борилмоқда.
Бундан аввал Тошкентда поезд устида селфи қилмоқчи бўлган 18 ёшли йигитни 27 минг волтли ток ургани ҳамда Тошкентда 8 ёшли қизалоқ электр токи уриши оқибатида вафот этгани ҳақида хабар берилганди.
Изоҳ (0)