Toshkent shahrida 15-yanvar kuni poyezd vagoni ustiga chiqib, rasmga tushmoqchi bo‘lgan 18 yoshli yigitni 27 ming voltli tok urdi, deya xabar bermoqda IIV matbuot xizmati.
Ta’kidlanishicha, “Sergeli” bekatidagi 3-yo‘lning 8-kilometri 1-to‘sig‘ida turgan vagon ustiga 2002-yilda tug‘ilgan mehribonlik uyi tarbiyalanuvchisi selfiga tushish maqsadida chiqqan.
Natijada uni 27 ming voltli tok urgan. Oqibatida yigit qattiq jarohatlangan.
Yigit voqeadan so‘ng tez tibbiy yordam mashinasida Respublika shoshilinch tibbiy yordam markaziga olib borilgan va jonlantirish bo‘limiga yotqizilgan. Ta’kidlanishicha, jarohat jiddiy bo‘lib, fuqaroga tananing 93 foizi 2–3 A,B darajali termik kuyish, 3-darajali bosh miya yopiq jarohati tashxisi qo‘yilgan.
Hozirda holat yuzasidan surishtiruv ishlari olib borilmoqda.
Avvalroq Xorazmda elektr tarmog‘iga o‘zboshimchalik bilan ulanish uchun simyog‘ochga chiqqan fuqaro tok urishi oqibatida halok bo‘lgani, Chirchiqda temiryo‘l vagoni ustida selfi qilmoqchi bo‘lgan yigit og‘ir tan jarohati olgani hamda Toshkentda 8 yoshli qizaloq elektr toki urishi oqibatida vafot etgani haqida xabar berilgandi.