Maktabgacha ta’lim vaziri Agrippina Shin 4-iyun kuni koronavirusga qarshi emlandi. Bu haqda vazirlik matbuot xizmati xabar berdi.
Agrippina Shin bilan birga vazirlik xodimlari ham emlangan. Xabarga ko‘ra, ular “Sputnik V” vaksinasini olgan. Hozirgacha maktabgacha ta’lim sohasida faoliyat yuritayotgan 104 mingga yaqin xodim emlangani ta’kidlangan.
Sog‘liqni saqlash vazirligi ma’lumotlariga ko‘ra, mamlakatda jami emlanganlar soni 3-iyun kuni 1 425 809 kishini tashkil etdi. Bunin uchun jami 2 243 591 doza vaksinadan foydalanildi.
Mamlakatda iyun oyi oxirigacha 4 million kishini koronavirusga qarshi emlash rejalashtirilgan. Birinchi navbatda 65 yoshdan yuqori insonlar, tibbiyot xodimlari, maktab o‘qituvchilari, maktabgacha ta’lim muassasasi xodimlari hamda surunkali xastaliklar kuzatiladigan fuqarolar koronavirusga qarshi emlash jarayonlarida ishtirok etayotgan edi. 31-maydan boshlab ushbu ro‘yxatga chet elga o‘qishga boradigan talabalar, ommaviy axborot vositalari (jurnalistlar, blogerlar), yozuvchilar, teleradiokompaniyada xizmat qiluvchi xodimlar qo‘shildi.
Eslatib o‘tamiz, 3-may kuni sog‘liqni saqlash vaziri o‘rinbosari – Sanitariya-epidemiologik osoyishtalik va jamoat salomatligi xizmati boshlig‘i, bosh davlat sanitariya vrachi Bahodir Yusupaliyev koronavirus infeksiyasiga qarshi ZF-UZ-VAC2001 vaksinasi bilan emlangandi. 1-iyun kuni Korzinka.uz supermarketlar tarmog‘i asoschisi Zafar Hoshimov koronavirusga qarshi Pfizer/BioNTech vaksinasining ikkinchi dozasi bilan emlanganini ma’lum qildi va boshqalarga ham buni tavsiya qildi.
Izoh (0)