Jons Hopkins universiteti ma’lumotlariga qaraganda, dunyoda koronavirusga chalinganlar soni 172 026 069 kishiga yetdi. Virus oqibatidagi o‘limlar soni 3 698 663 tani tashkil qilmoqda. Kasallanganlar soni bo‘yicha yuqori beshlikdan AQSh (33,3 million), Hindiston (28,4 million), Braziliya (16,8 million), Fransiya (5,7 million) va Turkiya (5,2 million) joy olgan.
Turkiya prezidenti uchta dozada COVID-vaksina olib, tanqidga uchradi
Turkiya prezidenti 67 yoshli Rajab Toyyib Erdo‘g‘on koronavirusga qarshi uchta dozada vaksina olganini ma’lum qildi, shundan keyin u mamlakatda birinchi o‘rinda emlanishi kerak bo‘lgan asosiy odamlarga vaksina yetishmayotgani tufayli, tanqidga uchradi.Erdo‘g‘on Xitoyning Sinovac vaksinasi bilan birinchi marta 14-yanvar kuni emlangan va Turkiyada COVID-vaksina olgan ilk odamlardan biri bo‘lgan edi. U Sinovac’ning ikkinchi dozasini 11-fevralda olgan, shu hafta esa u 10-mart kuni uchinchi dozani ham olgani ma’lum bo‘ldi. Shu bilan birga, Turkiya yetakchisi undagi antitanalar miqdori oshish-oshmasligini tekshirish maqsadida uchinchi marta emlanganini aytdi.
Ammo Turkiya prezidenti uchinchi marta qaysi vaksina bilan emlanganiga aniqlik kiritmadi: bu Sinovac yoki Pfizer bo‘lishi mumkin.
Turkiya rahbari qo‘shimcha dozani olgan bir paytda, Pfizer bilan bir marta emlangan odamlarga vaksinalar yetishmasligi tufayli, ikkinchi dozani bir oy emas, 12 hafta kutishga to‘g‘ri kelishini aytishgan.
Asosiy muxolifat partiyasining parlament guruhi rahbari Engin Ozkoch “Fuqarolar uchun bitta doza ham yo‘q, ammo Erdo‘g‘onga darhol uchta doza”, — deb yozdi Twitter’da.
Shu paytgacha Turkiyada 30 millionga yaqin dozada vaksina qo‘llanilgan, 12 million kishi — aholining 15,4 foizi ikkita doza olgan. Turizm sohasi xodimlari birinchi navbatda emlandi. Ammo o‘qituvchilar kabi asosiy ishchilar vaksinatsiyani uzoqroq kutishiga to‘g‘ri keldi. Virusga topshirgan testi musbat chiqqanlar ham olti oy mobaynida emlanishi taqiqlanadi.
Bashar Asadning emlangani haqidagi xabar rad etildi
Suriya prezidenti Bashar Asad COVID-19’ga qarshi vaksina olishi shart emas, chunki u yaqinda koronavirus bilan kasallanib o‘tgani uchun, unda antitanalar miqdori yuqori bo‘lib qolmoqda. Bu haqda Suriyaning Rossiyadagi elchisi Riyod Haddod ma’lum qildi.“Prezident Asad koronavirusga chalinib o‘tgan, unda antitanalar miqdori yuqori. Shu sababli unda vaksina olish ehtiyoji yo‘q”, — dedi Haddod. Asad va uning rafiqasi Asma al-Asad martda koronavirus bilan kasallangan edi.
Avvalroq Rossiya OAVlari xuddi shu elchiga asoslanib, Asadning emlangani haqida xabar bergan edi.
COVID-bemorlar qonida kislorod kamayib ketishi sababi ma’lum qilindi
Kanadalik olimlar COVID-19’ga chalingan vaqtda qonda kislorod miqdori pasayib ketishi sababini aniqladi. Alberta universiteti biologlari 128 nafar COVID-bemorlar qonini tahlil qilib chiqdi. Ular orasida turli darajada kasallanganlar bor edi.Aniqlanishicha, bemorlarda simptomlar og‘irlashib borgani sari, qonda yetilmagan, yaqinda shakllangan eritrotsitlar ko‘payib boraveradi. Sog‘lom odamlarda yetilmagan eritrotsitlar ilikda bo‘ladi, qonda umuman bo‘lmaydi yoki 1 foizdan kamroq bo‘lishi mumkin. COVID-19’ga chalingan og‘ir bemorlarda ushbu hujayralarning qondagi ulushi 60 foizgacha yetgan.
“Bu shuni bildiradiki, virus ushbu hujayralar manbasiga ta’sir o‘tkazadi. Natijada sog‘lom yetilmagan eritrotsitlar o‘rnini to‘ldirish uchun organizm ularni juda ko‘p ishlab chiqarib, yetarli miqdorda kislorod bilan ta’minlashga harakat qiladi”, — deya izohladi olimlar.
Shu bilan birga ta’kidlanishicha, asosiy muammo shundaki, kislorodni faqat yetilgan eritrotsitlar tashiydi, ular o‘rtacha 120 kunga yaqin yashaydi. Shuningdek, yetilmagan eritrotsitlar koronavirus infeksiyasiga juda ta’sirchan bo‘lib chiqdi. Virus yetilmagan eritrotsitlarga hujum qilib, ularni yo‘q qilishi tufayli, organizm o‘lib ketgan yetilgan eritrotsitlar o‘rnini to‘ldira olmaydi va qon oqimining kislorod tashish qobiliyati susayadi.
Olimlar so‘nggi yillarda COVID-19’ni davolashda keng qo‘llanilayotgan “Deksametazon” yetilmagan eritrotsitlarning virusga ta’sirchanligini pasaytira olishini aniqladi. “Deksametazon” ACE2 va TMPRSS2 retseptorlarining reaksiyasini bostirish bilan birga, yetilmagan eritrotsitlarning yetilishini tezlashtirishi ma’lum bo‘ldi.
Izoh (0)