Qirg‘iziston va Tojikiston chegarasida vaziyat keskinligicha qolmoqda. Bu haqda Qirg‘iziston Milliy xavfsizlik davlat qo‘mitasi chegara xizmati xabar qildi, deb yozadi “RBK”.
“Chegaraning Tojikiston tomonida avtomobillar va yengil zirhli transport vositalarida harbiy xizmatchilarning shaxsiy tarkibi to‘plangan. Milliy xavfsizlik davlat qo‘mitasi chegara xizmati ziddiyatning avj olishiga yo‘l qo‘ymaslik uchun barcha choralarni ko‘rmoqda”, — deyiladi chegara xizmati xabarida.
Xabarga ko‘ra, Tojikiston vakillari tunda O‘sh viloyati Chon-Olay tumani Unju-Buloq hududidagi tavsiflanmagan joyda konteyner o‘rnatishni boshlagan hamda Qirg‘iziston hududiga ming metrgacha kirib kelgan.
Chegara xizmati ta’kidlashicha, Qirg‘iziston vaziyatni tomonlarning chegara vakillari darajasida hal qilish bo‘yicha choralarni ko‘rmoqda. Biroq Tojikiston chegara xizmati vakillari telefon qo‘ng‘iroqlariga javob bermagan.
Chegara muammosi Qirg‘izistonda bir necha yildan beri dolzarb bo‘lib kelmoqda. Chegaradagi bahsli va tavsiflanmagan hududlar tufayli Qirg‘iziston va boshqa davlatlar aholisi o‘rtasida to‘qnashuvlar bo‘lib turadi.
So‘nggi marta aprel oyi oxirida Qirg‘iziston va Tojikistonning chegaraoldi viloyatlari aholisi o‘rtasidagi ziddiyat ikki mamlakat harbiylarining qurolli to‘qnashuviga aylanib ketgandi. Qirg‘iz-tojik chegarasidagi nizolarda Qirg‘izistonning 36 fuqarosi halok bo‘ldi, 200 ga yaqin kishi jarohat oldi. Tojikiston esa 19 kishi halok bo‘lgani, 87 kishi jabrlangani haqida xabar berdi. Mojaroda 300 dan ortiq uylar va infratuzilma obyektlari vayron qilingan, ayrimlari yonib ketgan. 29-aprel oqshomida tomonlar nizoni to‘xtatish va chegaradan harbiy kuchlarni olib ketish to‘g‘risida kelishib oldi, ammo ertasi kuni yana otishma boshlandi. 30-aprel kuni tushdan keyin navbatdagi sulhga erishildi. 3-may kuni Qirg‘iziston va Tojikiston o‘z harbiy kuchlarini chegara chizig‘idan olib chiqishni yakunladi.
Izoh (0)