Butun dunyoda koronavirusga chalingan odamlar soni 171 711 450 nafarga yetdi. Virus 3 693 164 kishining hayotiga zomin bo‘ldi. Jons Hopkins universiteti ma’lumotlari shundan dalolat bermoqda. Kasallanganlar sonining ko‘pligi bo‘yicha AQSh (33,3 million), Hindiston (28,54 million), Braziliya (16,7 million), Fransiya (5,7 million) va Turkiya (5,2 million) yetakchilik qilmoqda.
Foto: Getty Images
Suriya prezidenti Bashar Asad koronavirusga qarshi emlandi.
Mamlakatning Moskvadagi elchisi Riyod Xaddad ma’lum qilishicha, prezident Rossiyaning “Sputnik V” vaksinasi bilan emlangan.
Diplomat, shuningdek, “Sputnik V”ning birinchi partiyasi Suriyaga yetkazib berilganini ma’lum qildi.
Uning so‘zlariga ko‘ra birinchi partiya allaqachon yetkazilgan. Undan mamlakat shifokorlari va yuqori lavozimli amaldorlarini emlashda foydalanilgan. Ushbu bosqich nihoyasiga yetib, endilikda oddiy aholi emlanmoqda.
Diplomat Suriyaga yetkazib berilgan vaksinaning aniq miqdorini ayta olmasligini ta’kidladi.
Mavzuga doir: Suriya “Sputnik V” vaksinasini ro‘yxatdan o‘tkazdi va mamlakatda undan foydalanishga ruxsat berildi
D vitamini koronavirusning oldini olish uchun foydasiz bo‘lib chiqdi.
Besh mamlakat olimlarning birlashgan guruhi D vitamini COVID-19’ning oldini olishda foydasiz ekanini isbotladi.
Mutaxassislar D vitamini darajasi, koronavirusga sezuvchanlik va COVID-19 simptomlarining og‘irligi o‘rtasidagi sabab-oqibat bog‘liqligini baholash uchun Mendeleyev randomizatsiyasini o‘tkazdi.
D vitaminining COVID-19’ga ta’siri haqida ko‘proq bilish uchun tadqiqotchilar genetikaga murojaat qildi.
Kanada, Yaponiya, Isroil, Italiya va Buyuk Britaniya olimlari Mendeleyev randomizatsiyasi yordamida 11 mamlakatdan COVID-19 bilan kasallangan 4 mingdan ziyod odam va kasallanmagan 1,3 million odam DNKsini tahlil qildi.
Ular D vitaminining yuqori darajalariga bo‘lgan genetik moyillik kasallikning rivojlanishi va uning natijasi bilan bog‘liq yoki yo‘qligiga qiziqdi.
“Ushbu tadqiqotda biz 25OHD darajasi va koronavirusga sezuvchanlik, COVID-19 simptomlarining og‘irligi, uning oqibatida kasalxonaga yotqizish holatlari o‘rtasidagi bog‘liqlikni qo‘llab-quvvatlovchi dalil topmadik. Shuning uchun D vitamini COVID-19 oqibatlarining yomonlashuviga qarshi himoya sifatida genetik dalillar bilan qo‘llab-quvvatlanmaydi. Randomizatsiya ostida o‘tkaziladigan COVID-19 tadqiqotlarida boshqa terapevtik yoki profilaktika vositalariga ko‘proq e‘tibor qaratish lozim”, — deydi mutaxassislar.
Mavzuga doir: Koronavirusga qarshi vitaminlar: kasallikka chalinmaslik uchun ratsionni qanday tuzish kerak?
Shveysariyada yetti oy ichida birinchi marta COVID-19 tufayli o‘lim qayd etilmadi
Shveysariya hukumati o‘tgan sutkada oktabr oyidan beri birinchi marta koronavirusdan birorta ham o‘lim qayd etmadi.
Mamlakat Sog‘liqni saqlash vazirligining rasmiy ma’lumotlariga ko‘ra, o‘tgan 24 soat ichida Shveysariyada 717 kishida infeksiya aniqlangan. Umumiy hisobda pandemiya boshlanganidan buyon mamlakatda 696 213 kishi kasallikka chalingan.
Shu bilan birga, koronavirus 10 268 nafar shveysariyalikning hayotiga zomin bo‘lgan, ulardan 43 nafari so‘nggi ikki hafta ichida vafot etgan. Ta’kidlanishicha, so‘nggi marta 2020-yilning 3-oktabr kuni mamlakatda COVID-19’dan o‘lim kuzatilmagan.
