Ayni vaqtga qadar Belarus sudlari Telegram messenjeridagi qariyb 60 ta kanal va chatlarni ekstremistik deb topdi. Bu haqda 3-iyun kuni respublika Ichki ishlar vazirligida xabar berildi, deb yozmoqda “TASS”.
“3-iyun holatiga ko‘ra, sud qarori bilan 34 ta Telegram kanali va 24 ta Telegram chati ekstremistik deb topildi”, — deyiladi vazirlik bayonotida.
Ichki ishlar vazirligi ushbu resurslardan axborotlarni repost qilish yoki tarqatish qonun bilan javobgarlikka tortilishini eslatdi. “Ekstremistik materiallarni saqlash, shuningdek, ekstremistik deb topilgan Telegram kanallari va chatlariga obuna bo‘lish ma’muriy javobgarlikka sabab bo‘ladi”, — deyiladi Belarus Ichki ishlar vazirligi xabarida.
3-iyun kuni respublika Bosh prokuraturasi yana bir Telegram kanalini ekstremistik deb tan olganini e’lon qildi.
Vazirlik ma’lumotlariga ko‘ra, “Ekstremizmga qarshi kurashish to‘g‘risida”gi qonun asosida Jodino shahri (Minsk viloyati) prokurori Telegram kanalidagi “Jodino hayot uchun suhbat” ( “Жодино для жизни чат”) axborot mahsulotlarini ekstremistik materiallar deb tan olish to‘g‘risida bayonot tayyorladi va sudga yubordi.
Jodino sudi prokurorning bayonotini to‘liq qondirdi va qarorning zudlik bilan bajarilishiga imkon berdi”, — deya ta’kidladi prokuratura. Sud qarorining bir nusxasi ekstremistik materiallarning respublika ro‘yxatiga kiritilganini bildirish va Belarus hududida ekstremistik materiallarning tarqalishiga hissa qo‘shgan internet-resurslarni bloklash uchun Axborot vazirligiga yuborildi.
Belarusda 2020-yilning 9-avgustida bo‘lib o‘tgan prezident saylovlaridan so‘ng bir necha oy davomida saylov natijalariga nisbatan norozilik aksiyalari bo‘lib o‘tgan edi. Eng ommaviy norozilik namoyishlari ovoz berish natijalari e’lon qilingandan so‘ng uyushtirilgan va dastlabki kunlarda ular xavfsizlik kuchlari bilan to‘qnashuvlarga olib kelgan. Rasmiylar fikriga ko‘ra, ko‘plab harakatlar Telegram kanallari, shuningdek, messenjerlar va ijtimoiy tarmoqlardagi guruhlar orqali muvofiqlashtirilgan.
Belarusda ekstremistik deb topilgan birinchi Telegram kanali Nexta bo‘ldi. Respublika Oliy sudining 2020-yil 20-oktabrdagi qarori bilan telekanal va uning logotipi respublikada ekstremistik deb topildi. Uning asoschisi Stepan Putilo va sobiq bosh muharriri Roman Protasevichga tartibsizliklar va hukumat amaldorlarining qonuniy talablariga bo‘ysunmaslik, shuningdek, ijtimoiy adovat va ixtilofni qo‘zg‘ash bilan bog‘liq ommaviy harakatlarni uyushtirish bo‘yicha ayblovlar qo‘yildi.
Eslatib o‘tamiz, may oxirida Minskda Nexta muxolifatchi Telegram kanali sobiq muharriri Roman Protasevich qo‘lga olindi. U uchayotgan samolyot bomba haqidagi xabar tufayli Belarusga favqulodda qo‘ndirildi. Qo‘nish haqidagi qarorni Lukashenkoning shaxsan o‘zi “Yevropani himoya qilish” uchun qabul qilgan.
Izoh (0)