3-iyun kuni O‘zbekiston musulmonlari idorasi katta tezlikda mashina haydash oqibatida vafot etgan haydovchi o‘z joniga qasd qilgan maqomida bo‘lishi haqida fatvo berdi. “Gazeta.uz” fatvo bo‘limi mudiri G‘ulomjon Xolboyevga tayanib, ushbu shaxslarga janoza o‘qilishi yoki o‘qilmasligi borasidagi masalaga oydinlik kiritdi.
“Bizning hanafiy mazhabimizda o‘z joniga qasd qilgan kishiga ham janoza o‘qiladi. Shunday ekan, tezlikni oshirgani sabab halok bo‘lgan insonga ham janoza o‘qiladi”, — deydi G‘ulomjon Xolboyev.
O‘zbekiston Musulmonlari idorasining fatvosiga ko‘ra, ruxsat etilgandan yuqori tezlikda harakatlanishi oqibatida ro‘y bergan baxtsiz hodisa tufayli vafot etgan haydovchi shar’iy jihatdan haddidan oshgan va o‘z joniga qasd qilgan maqomida hisoblanadi. Shuningdek, yo‘l harakati qoidalariga amal qilmaydigan yoki bunga layoqati bo‘lmagan shaxslarning transport vositasini boshqarishi, yo‘l harakati xavfsizligiga tahdid soladigan holatda transport vositasini boshqarish shar’an joiz emas.
Bundan avval O‘zbekistondagi yo‘l harakati sohasidagi muammolarni o‘rganish va ularni bartaraf etish bo‘yicha ishchi guruh tuzilgani, O‘zbekistonda yilning dastlabki choragida yo‘l-transport hodisalarida halok bo‘lgan bolalar soni 64,5 foizga oshgani hamda Farg‘onada bir haftada YTHlar oqibatida 20 kishi halok bo‘lgani haqida xabar berilgandi.
Izoh (0)