Germaniyaning Amberge shahrida 1972-yilda ishlab chiqarilgan “GAZ-69” harbiy yo‘ltanlamasi 2990 yevro qiymatida sotuvga qo‘yildi. Modelning asosiy o‘ziga xosligi bu uning texnik modifikatsiyasida. Avtomobil 44 ot kuchiga ega Perkins agregati yordamida harakatga keladi, deb xabar beradi Motor.
Sotuvga qo‘yilgan “GAZ-69” konveyerdan 1973-yilda chiqqan. Yomon yo‘llarda ham harakatlanishga qodir yo‘ltanlamas faqatgina harbiy ehtiyojlar, shuningdek, qishloq xo‘jaligi sektori uchun ishlab chiqarilgan. Sovet avtomobili qanday qilib Germaniyaga borib qolgani noma’lum. Mashina egasi sovet avtomobili qachon va kim tomonidan modifikatsiya qilinganini ham ochiqlamagan.
“GAZ-69”ga zavodda o‘rnatilgan 55 ot kuchiga ega 2,1 litrli benzin dvigatel o‘rniga 44 ot kuchiga ega Perkins firmasining dizel motori o‘rnatilgan. Agregat mexanik transmissiya yordamida boshqariladi. Odometrga ko‘ra, yo‘ltanlamas hozirga qadar 29 ming kilometr yo‘l bosgan.
Sotuvchining so‘zlariga ko‘ra, harbiy avtomobil to‘liq soz holatda va ta’mirga muhtoj emas. Mashina kuzovidagi zanglash alomatlaridan tashqari, uning boshqa nuqsoni yo‘q. Mazkur “GAZ-69” 2990 yevroga baholanmoqda. Potensial xaridor uchun yagona muammo avtomobil hujjatlari bo‘lishi mumkin, chunki sotuvchida ular yo‘q.
Avvalroq Moskvada suzishga qodir 37 yillik yo‘ltanlamas 5,4 ming dollar narxida sotuvga qo‘yilgani to‘g‘risida xabar berilgandi.
Izoh (0)