Германиянинг Амберге шаҳрида 1972 йилда ишлаб чиқарилган «ГАЗ-69» ҳарбий йўлтанламаси 2990 евро қийматида сотувга қўйилди. Моделнинг асосий ўзига хослиги бу унинг техник модификациясида. Автомобиль 44 от кучига эга Perkins агрегати ёрдамида ҳаракатга келади, деб хабар беради Motor.
Сотувга қўйилган «ГАЗ-69» конвеердан 1973 йилда чиққан. Ёмон йўлларда ҳам ҳаракатланишга қодир йўлтанламас фақатгина ҳарбий эҳтиёжлар, шунингдек, қишлоқ хўжалиги сектори учун ишлаб чиқарилган. Совет автомобили қандай қилиб Германияга бориб қолгани номаълум. Машина эгаси совет автомобили қачон ва ким томонидан модификация қилинганини ҳам очиқламаган.
«ГАЗ-69»га заводда ўрнатилган 55 от кучига эга 2,1 литрли бензин двигатель ўрнига 44 от кучига эга Perkins фирмасининг дизель мотори ўрнатилган. Агрегат механик трансмиссия ёрдамида бошқарилади. Одометрга кўра, йўлтанламас ҳозирга қадар 29 минг километр йўл босган.
Сотувчининг сўзларига кўра, ҳарбий автомобиль тўлиқ соз ҳолатда ва таъмирга муҳтож эмас. Машина кузовидаги занглаш аломатларидан ташқари, унинг бошқа нуқсони йўқ. Мазкур «ГАЗ-69» 2990 еврога баҳоланмоқда. Потенциал харидор учун ягона муаммо автомобиль ҳужжатлари бўлиши мумкин, чунки сотувчида улар йўқ.
Аввалроқ Москвада сузишга қодир 37 йиллик йўлтанламас 5,4 минг доллар нархида сотувга қўйилгани тўғрисида хабар берилганди.
Изоҳ (0)