Дунёда меҳнатга лаёқатли кишиларнинг қарийб ярми (2,5 миллиард) ишлаш учун бошқа мамлакатга кўчиб ўтишни истайди. Потенциал мигрантлар олдида турган ҳозирги тўсиқларни олиб ташлаш глобал ялпи ички маҳсулот(ЯИМ)ни икки баравар ошириши мумкин. Бу ҳақда BCG таҳлилчиларининг ҳисоботига таяниб, «РБК» хабар берди.
«Меҳнат миграциясидаги тўсиқларни олиб ташлаш ўзгаришлар кўламига қараб, ҳар йили 15 триллиондан 95 триллион долларгача ижобий иқтисодий самара яратиши мумкин яъни бу глобал ЯИМни икки баравар кўпайтиришга қодир», — деди BCG мутахассиси Константин Полунин.
Жаҳон банки ва БМТ маълумотларига кўра, 2019 йилда глобал ЯИМ 87,735 триллион долларни ташкил этган, 2020 йилда эса у 4,3 фоизга камайган.
BCG тадқиқотининг муаллифлари сўнгги 20 йил ичида малакали меҳнат миграцияси даражаси товар ва хизматларнинг жаҳон савдоси ҳажмига нисбатан сезиларли даражада пасайганини таъкидлади — шу вақт ичида халқаро савдонинг жаҳон ЯИМдаги улуши қарийб 20 фоизга, умумий аҳоли сонидаги мигрантларнинг улуши эса атиги 0,7 фоизга ошган.
«Кўриниб турибдики, ушбу халқаро алмашинув соҳасининг салоҳияти анча юқори ва унинг жаҳон иқтисодиётига таъсири ҳали амалга оширилмаган», — дейди Полунин.BCG маълумотларига кўра, ҳозирги кунда дунёда 25 га яқин давлатда малакали ишчилар керагидан ортиқ, 60 дан ортиқ давлатлар эса уларнинг етишмаслигидан азият чекмоқда.
Шу билан бирга, сўнгги ўн йил ичида малакали мигрантлар оқимининг ярмидан кўпи атиги бешта мамлакатга тўғри келган:
- АҚШ;
- Буюк Британия;
- Германия;
- Канада;
- Австралия.
Аммо Полуниннинг сўзларига кўра, тажриба шуни кўрсатадики, миграция оқимлари «истеъдодларни ҳам экспорт қилувчи, ҳам импорт қилувчи мамлакатлар» иқтисодиётини ривожлантиришга қодир.
BCG ҳисоботида таъкидланишича, мигрантлар уларни қабул қилаётган мамлакатлардаги ишчи кучи етишмовчилигини қоплаб, маҳаллий ишлаб чиқарувчиларнинг товар ва хизматларига бўлган талабни ошириш билан иқтисодий ўсишни қўллаб-қувватлайди. Шу билан бирга, уларнинг аксарияти кейинчалик ўз бизнесларини очиш учун ватанига қайтиб, қолганларга намуна кўрсатмоқда.
Изоҳ (0)