Shimoliy Koreya Mehnat partiyasi (ShKMP)da yangi KXDR raisining birinchi o‘rinbosari, birinchi kotib lavozimi joriy qilinishi va mazkur lavozim Kim Chen Inning singlisi Kim Yo Chjonga topshirilishi mumkin. Bu haqda “Ryonhap” agentligi xabar berdi.
Xabarga ko‘ra, birinchi kotib partiya bosh kotibining o‘rinbosariga tegishli vakolatlar doirasida ish ko‘radi.
“Favqulodda holatlar yuz berganda, xususan, Kim Chen Inning sog‘lig‘ida muammolar yuzaga kelsa, rahbarlik vakolatlari Kim Yo Chjonga o‘tadi va u Kim Chen Inning o‘g‘li ulg‘ayguniga qadar rahbar vazifasini bajaradi”, — deb yozmoqda Janubiy Koreya sobiq tashqi ishlar vaziri Li Chon Sokga tayanib “Ryonhap”.
Li Chon Sokning qayd etishicha, birinchi kotibni saylash jarayoni partiyaning navbatdagi qurultoy chaqirishi bilan amalga oshadi. Nomzod partiya markaziy qo‘mitasining yalpi majlisida lavozimga tayinlanadi.
Shuningdek, Li Chon Sok KXDR yetakchisining yordamchisi Cho Yon Von ham mazkur lavozimni egallashi mumkin bo‘lgan nomzodlardan biri ekanini ta’kidlagan. Biroq Janubiy Koreya sobiq tashqi ishlar vaziri yordamchining Kim Chen In oilasiga aloqador emasligini inobatga olib, Cho Yon Vonning birinchi kotib lavozimini egallashining ehtimoli juda past ekanligini taxmin qilgan.
“Biz Cho Yon Von KXDR raisining o‘rinbosari lavozimini egallamaydi deb aniq ayta olmaymiz va Kim Chen Indan keyingi rahbar uchun barqarorlik rejimini saqlash muhim”, — degan Li Chon Sok.
CNN telekanali hukumat hujjatiga asoslangan holda birinchi kotib lavozimini kim egallashi hali noma’lum ekani haqida xabar bergan. Biroq ekspertlar mazkur lavozim bo‘sh ekanini inobatga olgan holda uni Cho Yon Von hamda KXDR Vazirlar kengashi raisi Dim Dok Xun egallashi mumkinligini taxmin qilgan.
Shimoliy Koreya OAV ma’lumotlari bo‘yicha Cho Yon Von hamda Kim Dok Xun 2021-yilda mamlakat miqyosida rasmiy tashriflar o‘tkazgan va avval Kim Chen Inning o‘zi rahbar sifatida o‘tkazgan yig‘ilishlarga raislik qilgan.
Ayrim tahlilchilar esa siyosiy byuroning doimiy a’zolarigina yangi joriy qilingan lavozimni egallashini prognoz qilgan. Kyonnam universiteti qoshidagi Shimoliy Koreya tadqiqotlari oliy maktabi professori Rim Ir Chxol Kim Chen Inning singlisi kelajakda uning o‘rnini egallay oladigan nomzod emasligini aytgan.
Kim Yo Chjon Koreya Mehnat partiyasining markaziy kengashi bo‘limlaridan biriga rahbarlik qiladi.“Ryonhap” agentligining yozishicha, partiyaning yanvar oyidagi qurultoyida mamlakatda raisdan keyingi ikkinchi rahbar, ya’ni birinchi kotib lavozimini joriy qilish masalasidagi qoidalar ko‘rib chiqilgan. Shuningdek, yil boshida Kim Chen In partiyaning bosh kotibi lavozimiga saylangan.
Avval Kim Chen Inning 24 kundan buyon omma oldida ko‘rinish bermagani xabar qilingandi.
Izoh (0)