Isroilda “Yesh Atid” partiyasi yetakchisi Yair Lapid mamlakat prezidentiga yangi koalitsion hukumat shakllantirilgani haqida xabar berdi. Agar u tasdiqlansa, hukumatni o‘n yildan ortiq boshqargan amaldagi bosh vazir Binyamin Netanyaxu o‘z lavozimini tark etadi, deb yozmoqda The Times of Israel.
Kelishuvga binoan, “Yamina” partiyasining rahbari Naftali Bennett 2023-yil sentabrigacha bosh vazir bo‘ladi, shundan so‘ng uning o‘rnini parlamentning vakolat muddati tugaydigan 2025-yil noyabriga qadar Lapid egallaydi.
Twitter sahifasida Lapid yangi hukumat barcha isroilliklar manfaati uchun xizmat qilishini va’da qildi. “Yangi hukumat raqiblarini hurmat qiladi va Isroil jamiyatining barcha qismlarini birlashtirish uchun bor imkoniyatlarni ishga soladi”, — deb yozgan “Yesh Atid” rahbari.
Shu bilan birga, “o‘zgarishlar hukumati” tarkibini prezident tasdiqlashi, shuningdek, Knesset (Isroil parlamenti) ma’qullashi kerak.
Gazeta yozishicha, yaqin ikki hafta ichida parlament ovozi bo‘lib o‘tishi ehtimoldan yiroq. Rasmiy ravishda parlament spikeri Yariv Levin yangi hukumatga ovoz berishni rejalashtirish zarurligi to‘g‘risida 7-iyundagina xabardor qilinadi. Shundan so‘ng, unga ovoz berishni rejalashtirish uchun bir hafta muhlat beriladi. Bu esa Netanyaxu va uning tarafdorlarida deputatlar fikrini o‘zgartirish hamda Lapidni ko‘pchilik ovozdan mahrum qilish uchun 12 kun vaqt borligini bildiradi.
The Times of Israel xabariga ko‘ra, “Yamina” partiyasi deputatlaridan biri yangi koalitsion hukumatga qarshi ovoz berishi mumkinligini aytgan. Bu Lapidning rejasini buzishi mumkin, deya qo‘shimcha qiladi gazeta.
Avvalroq Isroil bosh vaziri Binyamin Netanyaxu belgilangan vaqt ichida hukumat tuza olmaganini ma’lum qilgandi. Agar hukumat tuzilmasa, Isroil parlamenti tarqatib yuboriladi va mamlakatda yangi saylovlar o‘tkazishga to‘g‘ri keladi, bu hol 2019-yil aprelidan beri besh marta kuzatilgan.
Izoh (0)