Исроил мухолифати Нетаньяхусиз ҳукумат шакллантирилганини маълум қилди

Исроилда «Еш Атид» партияси етакчиси Яир Лапид мамлакат президентига янги коалицион ҳукумат шакллантирилгани ҳақида хабар берди. Агар у тасдиқланса, ҳукуматни ўн йилдан ортиқ бошқарган амалдаги бош вазир Бинямин Нетаньяху ўз лавозимини тарк этади, деб ёзмоқда The Times of Israel.

Келишувга биноан, «Ямина» партиясининг раҳбари Нафтали Беннетт 2023 йил сентябригача бош вазир бўлади, шундан сўнг унинг ўрнини парламентнинг ваколат муддати тугайдиган 2025 йил ноябрига қадар Лапид эгаллайди.

Twitter саҳифасида Лапид янги ҳукумат барча исроилликлар манфаати учун хизмат қилишини ваъда қилди. «Янги ҳукумат рақибларини ҳурмат қилади ва Исроил жамиятининг барча қисмларини бирлаштириш учун бор имкониятларни ишга солади», — деб ёзган «Еш Атид» раҳбари.

Шу билан бирга, «ўзгаришлар ҳукумати» таркибини президент тасдиқлаши, шунингдек, Кнессет (Исроил парламенти) маъқуллаши керак.

Газета ёзишича, яқин икки ҳафта ичида парламент овози бўлиб ўтиши эҳтимолдан йироқ. Расмий равишда парламент спикери Ярив Левин янги ҳукуматга овоз беришни режалаштириш зарурлиги тўғрисида 7 июндагина хабардор қилинади. Шундан сўнг, унга овоз беришни режалаштириш учун бир ҳафта муҳлат берилади. Бу эса Нетаньяху ва унинг тарафдорларида депутатлар фикрини ўзгартириш ҳамда Лапидни кўпчилик овоздан маҳрум қилиш учун 12 кун вақт борлигини билдиради.

The Times of Israel хабарига кўра, «Ямина» партияси депутатларидан бири янги коалицион ҳукуматга қарши овоз бериши мумкинлигини айтган. Бу Лапиднинг режасини бузиши мумкин, дея қўшимча қилади газета.

Аввалроқ Исроил бош вазири Бинямин Нетаньяху белгиланган вақт ичида ҳукумат туза олмаганини маълум қилганди. Агар ҳукумат тузилмаса, Исроил парламенти тарқатиб юборилади ва мамлакатда янги сайловлар ўтказишга тўғри келади, бу ҳол 2019 йил апрелидан бери беш марта кузатилган.