Prezident Rajab Toyyib Erdo‘g‘on foiz stavkalarini pasaytirish zarurligini takrorlaganidan keyin turk lirasi 2-iyun kuni uch foizga qadrsizlandi, deb yozmoqda Spot.
“Men bugun Markaziy bankimizning boshqaruvchisi bilan gaplashdim. Foiz stavkalarini tushurish juda muhim”, — dedi Turkiya yetakchisi TRT telekanali bilan bo‘lgan suhbatda.
Shuningdek, u taxminiy sanalarning iyul va avgust oylari ekanini aytdi. Uning so‘zlariga ko‘ra, stavkalarni pasaytirish ishlab chiqaruvchilarning xarajatlarini kamaytiradi va narxlarning o‘sishini sekinlashtiradi.
Bundan tashqari, Bloomberg lirani rivojlanayotgan bozorlar ichidagi eng yomon valyuta deb atadi — oxirgi oylarda u 16 foizga qadrsizlandi.
Nashrning qayd etishicha, davlat rahbarining xatti-harakatlari vaziyatni yanada keskinlashtirmoqda. Inflyatsiya yuqori bo‘lganida, stavka odatda yuqori darajada ushlab turiladi. Turkiyada esa inflyatsiya 17 foizni tashkil qilmoqda, lekin Erdo‘g‘on bunga zid harakat qilmoqda, chunki bu uning xalq orasidagi obro‘siga salbiy ta’sir ko‘rsatishi mumkin.
Koronavirus allaqachon mamlakatda hukmron partiyaning pozitsiyalari bo‘yicha katta zarar yetkazdi, chunki ishsizlik 13,1 foizga yetdi. 2020-yilda stavkaning muddatidan oldin pasayishi liraning qadrsizlanishiga va narxlarning ko‘tarilishiga olib kelgan edi.
So‘nggi bir yil ichida Turkiyada oziq-ovqat narxlari 20 foizga oshdi, bu esa ijtimoiy so‘rovlarda Erdo‘g‘on reytingining pasayishiga sabab bo‘ladi. Stavkalarni past darajada ushlab turish — bu reytingni oshirishga qaratilgan siyosiy qaror hisoblanadi, lekin iqtisodiyot nuqtayi nazaridan bu valyuta inqiroziga olib kelishi mumkin, deya avvalroq Reuters ogohlantirgan edi.
Avvalroq Rajab Toyyib Erdo‘g‘on mamlakat markaziy banki rahbari Nasi Agbalni ishdan bo‘shatib, turk lirasining qadrsizlanishiga sabab bo‘ldi. Bir kun davomida milliy valyuta 14 foizga qadrsizlanib, bir dollar uchun 8,35 liragacha arzonlashgani haqida xabar berildi.
Izoh (0)