Президент Ражаб Тоййиб Эрдўғон фоиз ставкаларини пасайтириш зарурлигини такрорлаганидан кейин турк лираси 2 июнь куни уч фоизга қадрсизланди, деб ёзмоқда Spot.
«Мен бугун Марказий банкимизнинг бошқарувчиси билан гаплашдим. Фоиз ставкаларини тушуриш жуда муҳим», — деди Туркия етакчиси TRT телеканали билан бўлган суҳбатда.
Шунингдек, у тахминий саналарнинг июль ва август ойлари эканини айтди. Унинг сўзларига кўра, ставкаларни пасайтириш ишлаб чиқарувчиларнинг харажатларини камайтиради ва нархларнинг ўсишини секинлаштиради.
Бундан ташқари, Bloomberg лирани ривожланаётган бозорлар ичидаги энг ёмон валюта деб атади — охирги ойларда у 16 фоизга қадрсизланди.
Нашрнинг қайд этишича, давлат раҳбарининг хатти-ҳаракатлари вазиятни янада кескинлаштирмоқда. Инфляция юқори бўлганида, ставка одатда юқори даражада ушлаб турилади. Туркияда эса инфляция 17 фоизни ташкил қилмоқда, лекин Эрдўғон бунга зид ҳаракат қилмоқда, чунки бу унинг халқ орасидаги обрўсига салбий таъсир кўрсатиши мумкин.
Коронавирус аллақачон мамлакатда ҳукмрон партиянинг позициялари бўйича катта зарар етказди, чунки ишсизлик 13,1 фоизга етди. 2020 йилда ставканинг муддатидан олдин пасайиши лиранинг қадрсизланишига ва нархларнинг кўтарилишига олиб келган эди.
Сўнгги бир йил ичида Туркияда озиқ-овқат нархлари 20 фоизга ошди, бу эса ижтимоий сўровларда Эрдўғон рейтингининг пасайишига сабаб бўлади. Ставкаларни паст даражада ушлаб туриш — бу рейтингни оширишга қаратилган сиёсий қарор ҳисобланади, лекин иқтисодиёт нуқтаи назаридан бу валюта инқирозига олиб келиши мумкин, дея аввалроқ Reuters огоҳлантирган эди.
Аввалроқ Ражаб Тоййиб Эрдўғон мамлакат марказий банки раҳбари Наси Агбални ишдан бўшатиб, турк лирасининг қадрсизланишига сабаб бўлди. Бир кун давомида миллий валюта 14 фоизга қадрсизланиб, бир доллар учун 8,35 лирагача арзонлашгани ҳақида хабар берилди.
Изоҳ (0)