Xitoy hukumatiga aloqador bo‘lgan xakerlar AQShning Nyu-York metrosiga kiberhujum uyushtirdi. Bu haqda AQShning Metropolitan Transportation Authority (MTA) transport kompaniyasiga tayanib, The New York Times xabar berdi.
Aprel oyida xakerlar tizimdagi zaiflikdan foydalanib Nyu-York transport ma’muriyatining kompyuter tarmog‘iga buzib kirgan. 20-aprel kuni kiberhujum uyushtirilgani ma’lum bo‘lgan, 18 ta kompyuter tizimidan uchtasiga hujum qilingan. Xakerlar poyezdlar ustidan nazoratni qo‘lga kirita olmagani uchun yo‘lovchilarga hech narsa xavf solmagan. Shuningdek, xakerlar kompaniya faoliyatiga hech qanday o‘zgartirishlar kiritmagan va xodimlar yoki mijozlar to‘g‘risidagi ma’lumotlarni o‘g‘irlamagan.
The New York Times gazetasining yozishicha, hujum ortida ikkita xakerlik guruhi turibdi, shulardan biri Xitoy hukumati homiyligidagi guruh bo‘lishi mumkin.
Kompaniyaning xabar berishicha, kiberhujumning deyarli hech qanday zarar keltirmaganiga qaramay, tizimga buzib kirish mumkinligining o‘zi xavotir uyg‘otmoqda. MTA kiberhujum haqida hukumat va politsiyaga ma’lum qildi. Dasturiy ta’minot kompaniyasi zaifliklarni bartaraf etish uchun xavfsizlikning yangilangan versiyasini ishlab chiqdi. Nyu-York transportining rasmiy vakili yangilangan versiyaning chiqarilganidan keyin 24 soat ichida tuzatishlar amalga oshirilganini ta’kidladi.
Nashrning yozishicha, kiberhujumning sabablari va maqsadlarini aniqlash bo‘yicha tergovda turli xil variantlar mavjud. Bu bir necha milliard dollarlik temiryo‘llar vagonlarini ishlab chiqaruvchi bozorda Xitoyning hukmronlik qilishga intilish bo‘lishi mumkin. Shu bilan birga, xakerlar MTA tizimiga xatolik sababli buzib kirib, u yerdan hech qanday kerakli ma’lumot topa olmagan bo‘lishi ehtimoli ham mumkin. Kiberxavfsizlik mutaxassislarining fikriga ko‘ra, bunday holatlar noodatiy hisoblanmaydi.
Avvalroq AQShning sharqiy qirg‘og‘idagi bir nechta shtatlarda yonilg‘i tanqisligi sababli mintaqaviy favqulodda holat e’lon qilindi. Florida, Jorjiya, Shimoliy Karolina va Virjiniya shtatlari gubernatorlari yonilg‘isi tugab borayotgan benzin shoxobchalarini kamaytirish uchun favqulodda holat e’lon qildi. Colonial Pipeline liniyasining kutilmagan tarzda berkitilishi ta’sirida qolgan shtatlarda benzin, dizel yonilg‘isi, aviatsiya yonilg‘isi va boshqa neftni qayta ishlash mahsulotlari ta’minoti uzilib qoldi.
Keyinroq Colonial Pipeline quvur liniyasi kiberhujumdan so‘ng faoliyatini qayta tikladi. Kompaniya xakerlarga 5 mln dollar to‘lagani ma’lum bo‘ldi.
Izoh (0)