Хитой ҳукуматига алоқадор бўлган хакерлар АҚШнинг Нью-Йорк метросига киберҳужум уюштирди. Бу ҳақда АҚШнинг Metropolitan Transportation Authority (МТА) транспорт компаниясига таяниб, The New York Times хабар берди.
Апрель ойида хакерлар тизимдаги заифликдан фойдаланиб Нью-Йорк транспорт маъмуриятининг компьютер тармоғига бузиб кирган. 20 апрель куни киберҳужум уюштирилгани маълум бўлган, 18 та компьютер тизимидан учтасига ҳужум қилинган. Хакерлар поездлар устидан назоратни қўлга кирита олмагани учун йўловчиларга ҳеч нарса хавф солмаган. Шунингдек, хакерлар компания фаолиятига ҳеч қандай ўзгартиришлар киритмаган ва ходимлар ёки мижозлар тўғрисидаги маълумотларни ўғирламаган.
The New York Times газетасининг ёзишича, ҳужум ортида иккита хакерлик гуруҳи турибди, шулардан бири Хитой ҳукумати ҳомийлигидаги гуруҳ бўлиши мумкин.
Компаниянинг хабар беришича, киберҳужумнинг деярли ҳеч қандай зарар келтирмаганига қарамай, тизимга бузиб кириш мумкинлигининг ўзи хавотир уйғотмоқда. МТА киберҳужум ҳақида ҳукумат ва полицияга маълум қилди. Дастурий таъминот компанияси заифликларни бартараф этиш учун хавфсизликнинг янгиланган версиясини ишлаб чиқди. Нью-Йорк транспортининг расмий вакили янгиланган версиянинг чиқарилганидан кейин 24 соат ичида тузатишлар амалга оширилганини таъкидлади.
Нашрнинг ёзишича, киберҳужумнинг сабаблари ва мақсадларини аниқлаш бўйича терговда турли хил вариантлар мавжуд. Бу бир неча миллиард долларлик темир йўллар вагонларини ишлаб чиқарувчи бозорда Хитойнинг ҳукмронлик қилишга интилиш бўлиши мумкин. Шу билан бирга, хакерлар МТА тизимига хатолик сабабли бузиб кириб, у ердан ҳеч қандай керакли маълумот топа олмаган бўлиши эҳтимоли ҳам мумкин. Киберхавфсизлик мутахассисларининг фикрига кўра, бундай ҳолатлар ноодатий ҳисобланмайди.
Аввалроқ АҚШнинг шарқий қирғоғидаги бир нечта штатларда ёнилғи танқислиги сабабли минтақавий фавқулодда ҳолат эълон қилинди. Флорида, Жоржия, Шимолий Каролина ва Виржиния штатлари губернаторлари ёнилғиси тугаб бораётган бензин шохобчаларини камайтириш учун фавқулодда ҳолат эълон қилди. Colonial Pipeline линиясининг кутилмаган тарзда беркитилиши таъсирида қолган штатларда бензин, дизель ёнилғиси, авиация ёнилғиси ва бошқа нефтни қайта ишлаш маҳсулотлари таъминоти узилиб қолди.
Кейинроқ Colonial Pipeline қувур линияси киберҳужумдан сўнг фаолиятини қайта тиклади. Компания хакерларга 5 млн доллар тўлагани маълум бўлди.
Изоҳ (0)