Buxoro viloyati hududlarida 31-may kuni kuchli shamol va chang bo‘ronlari kuzatildi. Bu haqda ijtimoiy tarmoqlarda videoxabarlar qoldirilgan.
Eslatib o‘tamiz, Toshkent shahrida 29-may kuni soat 21:00 atrofida boshlanib, taxminan, bir soatdan ortiq davom etgan kuchli shamol chang bo‘ronlarini keltirib chiqargandi. Shu kuni chang bo‘roni sabab Buxorodan kelayotgan charter reys Toshkentga qo‘na olmagan.
Telegram’dagi “Gidrometeorologik ilmiy tahlillar, ob-havo bashoratlari, tadqiqotlar” kanalining yozishicha, 2-iyun kuni soat 14:30 da Namangan shahrida bulutosti shamollari havoning o‘ta quruqligi bois kuchsiz chang bo‘ronlarini keltirib chiqargan.
Ta’kidlanishicha, shaharda shamol tezligi soniyasiga 11 metrga kuchaygan. “14:42 da Namangan shahrida ko‘rinuvchanlik 2600 metrgacha cheklangan kuchsiz chang bo‘ronlari yuzaga keldi. Shamol tezligi kuchayganda soniyasiga 17 metrgacha yetdi”, — deyiladi xabarda.
Avvalroq 20-may kuni Toshkentda kuzatilgan kuchli shamol yerusti metro bekatlaridan birining tom qismiga zarar yetkazgani, 29-may kuni Farg‘ona viloyatining Farg‘ona tumani Vodil hududlarida kuchli shamol va chang bo‘ronlari kuzatilgani haqida xabar berilgan edi.
Izoh (0)