Prezident Shavkat Mirziyoyev 2-iyun kuni Surxondaryo viloyati faollari bilan uchrashuvda viloyatni yanada rivojlantirish bo‘yicha vazirlar va hokimlarga tegishli topshiriqlar bergani, buning natijasini esa aholi, albatta, his qilishi kerakligini ta’kidladi, deb xabar bermoqda “Gazeta.uz”.
“Surxondaryoda 100 ming kishi ishsiz, 80 ming nafari chet elda… Hokimlar bo‘yinbog‘ini yechib qo‘yib, haftada bir kun fuqarolar orasida yurib, masalalarni hal qilsa, men ulardan rozi bo‘laman… Toshkent ko‘mak berishi kerak, lekin viloyatlar o‘zining aravasini o‘zi tortishi kerak”, — deb ta’kidlagan Prezident.
Davlat rahbari deputatlar odamlarning muammolarini o‘rganmayotgani haqida ham gapirdi.
“Mana, kecha ko‘plab odamlar ‘Prezident bilan uchrashishim kerak’, deyapti. Ular ham bizning xalq. Nimaga deputatlar borib gaplashmaydi? Nimaga ularning muammosini o‘rganmaydi? Qilsa bo‘ladi-ku… Meni qog‘ozdagi raqamlar qoniqtirmaydi. Xalqni rozi qilmasak, ularni ishontirmasak, ertaga ular bizni qo‘llab-quvvatlamaydi. Shuning uchun bugun masalani o‘rtaga qo‘yinglar, savol beringlar. Men Surxondaryoga muammolarni hal qilish uchun kelganman”, — degan u.
Davlat rahbari viloyat jamoatchilik vakillari, vazirlik va idoralar rahbarlari bilan o‘tkazilgan ushbu yig‘ilishda 4 ta sektor rahbarlarining odamlar oldidagi mas’uliyatini oshirish haqida ham so‘zlagan.
“Sizlar o‘z hududingizdagi muammoni bilmaysizmi? Dod deganlarning uyiga boringlar, yaxshidan ko‘ra yomonning uyiga boringlar, ularning tilidan eshitinglar, ko‘ringlar va ular tushunadigan tilda gapiringlar. Kabinetga qorovullik qilish o‘rniga odamlar oldiga, uyiga borib, muammolarni hal qilish kerak. Yoshlar, xotin-qizlar, temir daftar bo‘yicha ishlash kerak”, — degan Prezident.
Eslatib o‘tamiz, Shavkat Mirziyoyev 2021-yilning boshida o‘tkazgan yig‘ilishda ayrim vazir va hokimlar yetarlicha ishlamayotganini tanqid qilgandi. “Shuncha va’zxonlik yetadi, ularga qancha imkoniyatlar berdik, ammo samarali natija ko‘rsatishmadi. Boshqacha ishlash vaqti keldi”, — degan edi Prezident.
Izoh (0)