Prezident Shavkat Mirziyoyev ayni paytda Surxondaryo viloyati faollari bilan o‘tkazilayotgan yig‘ilishda deputatlarni faol bo‘lishga chaqirdi, deya xabar bermoqda “Daryo” muxbiri.
“Oxirgi yillarda tuman kengashlariga ko‘p vakolatlar berdik. Kim u tuman kengashi? Xalq vakili! Xalq vakili kim? O‘sha hududdagi xalq dardi bilan yashagan, muammolarga befarq bo‘lmagan, fidoyi, deputat sifatida kengashga saylangan odam”,— dedi Prezident.
Davlat rahbari viloyatni yanada rivojlantirish uchun davlat budjetidan 1,9 trillion so‘m ajratilganini ta’kidlagandi.
“Surxondaryoning eng olis hududlaridagi vaziyatni o‘zim yaxshi bilaman. Ko‘mak nuqtayi nazardan juda katta mablag‘ bilan keldik. Bu kichkina mablag‘ emas. Qani jamoatchilik, qani deputatlar? Nima uchun viloyatga 1,9 trillion so‘m pul beryapmiz? Ijtimoiy sohaga, yo‘llarga, uzoq joylarga 20 yil davomida buncha pul ajratmaganmiz. Nazorati qani? Deputatlarning ovozi qani? Siyosatni kim amalga oshiradi? Xalq vakili bo‘lgan siz deputatlar amalga oshirasizlar. Tuman hokimlari, sektor rahbarlari, mahalla raislari, deputatlar o‘zini qiynashi kerak. Agar qiynay olmasa, ketishi kerak. Yosh, zabardast, fidoyi, bilimli kadrlar kirib kelishi kerak”, — dedi Shavkat Mirziyoyev.
Eslatib o‘tamiz, Shavkat Mirziyoyev hududlar iqtisodiyoti, aholi turmush sharoitlari bilan yaqindan tanishish maqsadida 1-iyundan buyon Surxondaryo viloyatida bo‘lib turibdi. Davlat rahbari viloyatga tashrifini Sherobod tumanidan boshlab, tumandagi quyosh fotoelektr stansiyasi quriladigan maydonga bordi, zamonaviy issiqxona va anor qadoqlash korxonasi bilan tanishdi. Angor tumanidagi “Angor Surxon g‘ururi” klasterida bo‘lib, g‘alla va g‘o‘za rivojini ko‘zdan kechirdi. Shuningdek, Termizdagi yangilangan “Ayritom” chegara bojxona postini borib ko‘rdi, Termiz xalqaro savdo markazi bosh rejasi bilan tanishdi.
Izoh (0)